Падзеі

"Шлях да шматпалярнасці не будзе простым". Хрэнін аб трансфармацыі сістэмы міжнародных адносін

Віктар Хрэнін. Фота Міністэрства абароны

30 кастрычніка, Мінск /Кар. БЕЛТА/. Міністр абароны Беларусі Віктар Хрэнін выступіў з дакладам на 10-м Пекінскім форуме па пытаннях бяспекі "Сяньшань". Аб гэтым паведамляе БЕЛТА са спасылкай на прэс-службу Міністэрства абароны.

Віктар Хрэнін ад імя Беларусі прывітаў удзельнікаў 10-га Пекінскага форуму. Ён таксама выказаў словы ўдзячнасці кітайскім калегам за запрашэнне наведаць іх краіну і выступіць з трыбуны форуму. "Чарговы раз нам прадастаўлена ўнікальная магчымасць падзяліцца сваім бачаннем пытанняў глабальнай бяспекі. Глабальная бяспека - гэта асноўная ідэя, вакол якой будуецца работа ўсяго форуму. І не выпадкова ўжо на першым пасяджэнні мы гаворым пра адказнасць і супрацоўніцтва ўсіх краін у справе яе забеспячэння", - сказаў Віктар Хрэнін.

На думку кіраўніка ваеннага ведамства, асабліва актуальным гэта становіцца ў сучасным свеце, які фундаментальна мяняецца. "Беларусь імкнецца захаваць у ім суверэнітэт, права на канструктыўнае ўзаемадзеянне з усімі краінамі. І мы бачым, што такую пазіцыю падзяляе большасць свабодных дзяржаў планеты. Разам з тым, мы разумеем, што шлях да шматпалярнасці не будзе простым", - лічыць Віктар Хрэнін.

Міністр абароны адзначыў, што трансфармацыя сістэмы міжнародных адносін чакана сутыкаецца з актыўным процідзеяннем прыхільнікаў аднапалярнай мадэлі светаўладкавання. "Яны будуць прадаўжаць шукаць новыя магчымасці для захавання свайго дамінавання. І ваенная сіла, на жаль, тут будзе заставацца адным з галоўных аргументаў", - падкрэсліў міністр абароны.

Як паведамлялася раней, форум праходзіць 29-31 кастрычніка ў Міжнародным цэнтры канферэнцый у Пекіне. У мерапрыемстве прымаюць удзел прадстаўнікі ўзроўню міністра абароны з больш як 40 краін свету.

версія для друку

зрабіць стартавай

дабавіць у выбранае