Падзеі

Шэстакоў: Беларусь ніколі не мяняла сваіх падыходаў у адносінах да Палесціны

30 лістапада, Мінск /Кар. БЕЛТА/. Беларусь ніколі не мяняла сваіх падыходаў у адносінах да Палесціны. Аб гэтым заявіў намеснік міністра замежных спраў Беларусі Яўген Шэстакоў 29 лістапада на вечары ў Доме дружбы з нагоды Міжнароднага дня салідарнасці з палесцінскім народам, паведамляе карэспандэнт БЕЛТА.

"Гэты сімвалічны дзень нагадвае нам аб тым, што ўжо больш як 75 гадоў застаецца нявырашаным канфлікт паміж  Палесцінай і Ізраілем, адзін з самых доўгіх у сучаснай гісторыі. Сёння позіркі ўсяго свету прыкаваны да Блізкага Усходу, дзе мы, на вялікі жаль, назіраем чарговы віток палесціна-ізраільскага процістаяння", - адзначыў намеснік міністра.

"Сумна, што за загалоўкамі навін вядучых інфармацыйных агенцтваў, скупымі фармулёўкамі і лічбамі са статыстыкай пацярпелых і загінулых ні ў чым не вінаватых людзей хаваюцца няпростыя чалавечыя лёсы і справядлівыя спадзяванні палесцінскага народа, які на працягу доўгіх гадоў імкнецца здабыць дзяржаўнасць, суверэнітэт, незалежнасць і жыць нармальным жыццём ва ўмовах працвітання і міру", - сказаў Яўген Шэстакоў.

Ён звярнуўся да слоў вялікага беларускага паэта і песняра Янкі Купалы, які ў адным са сваіх твораў пакінуў запавет незалежна ад існуючых абставін любіць Радзіму як дадзены дар, захоўваць ёй вернасць і бачыць айчыну шчаслівай.

Яўген Шэстакоў заявіў: "Беларусь ніколі не мяняла сваіх падыходаў у адносінах да Палесціны. Мы салідарныя з палесцінскім народам і зацікаўлены ва ўсёабдымным вырашэнні палесцінскага пытання ў адпаведнасці з міжнароднымі нормамі і рашэннямі Генеральнай Асамблеі ААН дзеля дасягнення міру на Блізкім Усходзе і працвітання Палесціны. З часоў БССР наша дзяржава як краіна-заснавальніца Арганізацыі Аб'яднаных Нацый паслядоўна выступае за няўхільнае выкананне Статута ААН. Адно з галоўных універсальных палажэнняў гэтага дакумента - прынцып роўнасці і самавызначэння народаў, мэтай якога з'яўляецца развіццё дружалюбных адносін паміж нацыямі на аснове ўзаемнай павагі. Мы шчыра верым у асноўную ролю структур ААН у гэтым працэсе".

"Сучасная сітуацыя, калі свет пастаўлены на мяжу глабальнай вайны, як нельга лепш паказвае безальтэрнатыўнасць мірнага суіснавання для паспяховага развіцця ўсіх дзяржаў і народаў. Наша краіна падтрымлівае імкненне рэалізаваць неад'емныя правы палесцінскага народа на стварэнне ўласнай незалежнай і тэрытарыяльна цэласнай дзяржавы, якая суіснуе з Ізраілем у міры і бяспецы ў рамках міжнародна прызнаных граніц, на забеспячэнне міру, бяспекі, устойлівага развіцця, адукацыі і аховы здароўя", - падкрэсліў намеснік міністра.

"Як адзначыў кіраўнік дзяржавы, у палесціна-ізраільскім канфлікце няма сілавога вырашэння, а далейшая яго эскалацыя прывядзе да ўцягвання новых краін у гэта процістаянне. Стварэнне дзвюх дзяржаў для двух народаў - яўрэйскага і палесцінскага - у адпаведнасці з рашэннем 1947 года будзе садзейнічаць дасягненню міру ў Блізкаўсходнім рэгіёне", - заявіў намеснік міністра.

Яўген Шэстакоў выказаў меркаванне, што ўстанаўленне трывалага міру на Блізкім Усходзе з'яўляецца важнай асновай эканамічнага развіцця і працвітання, фактарам росту міжнароднага гандлю і доўгатэрміновай стабільнасці дзяржаў гэтага рэгіёна, у чым сёння зацікаўлены краіны ўсяго свету.

На заканчэнне ён падкрэсліў: "Выказваю надзею на тое, што надыдзе час, калі палесцінскі народ паспяхова завершыць свой шлях да дасягнення нацыянальнай незалежнасці, а народы Блізкага Усходу здабудуць мірнае неба над галавой, спакой і дабрабыт. Жадаю ўсім палесцінцам міру, шчасця і працвітання, а беларуска-палесцінскай дружбе - далейшага ўмацавання і развіцця".

У сваю чаргу Надзвычайны і Паўнамоцны Пасол Дзяржавы Палесціна ў Рэспубліцы Беларусь Ахмед Махамед аль-Мадбух расказаў аб сітуацыі, у якой знаходзіцца палесцінскі народ, і запатрабаваў неадкладнага спынення агню ў сектары Газа.

Як паведамлялася БЕЛТА, Прэзідэнт Беларусі Аляксандр Лукашэнка павіншаваў Прэзідэнта Дзяржавы Палесціна Махмуда Абаса з Міжнародным днём салідарнасці з палесцінскім народам. "Беларусь як краіна - заснавальніца Арганізацыі Аб'яднаных Нацый паслядоўна выступае за няўхільнае выкананне Статута ААН, - гаворыцца ў віншаванні. - У цяперашні непрадказальны перыяд турбулентнасці ў сферах глабальнай палітыкі, эканомікі і бяспекі як ніколі раней актуальна гучыць адно з галоўных палажэнняў гэтага дакумента - прынцып раўнапраўя і самавызначэння народаў, які ставіць мэтай развіццё дружалюбных адносін паміж нацыямі на аснове ўзаемнай павагі". Прэзідэнт звярнуў увагу, што на працягу апошніх 75 гадоў становіцца ўсё больш гучным заклік палесцінцаў да міжнароднай супольнасці падтрымаць іх на шляху здабывання дзяржаўнасці і нацыянальнага суверэнітэту ў адпаведнасці з агульнапрынятымі міжнародна-прававымі нормамі і рашэннямі Генеральнай Асамблеі ААН. ​"Сёння большай частцы чалавецтва зразумела, што пошук гістарычнага кампрамісу для стварэння Дзяржавы Палесціна, устанаўленне справядлівага і трывалага міру на Блізкім Усходзе з'яўляюцца важнай асновай не толькі дабрабыту рэгіёна, але і стабільнасці ва ўсім свеце", - падкрэсліў беларускі лідар.

версія для друку

зрабіць стартавай

дабавіць у выбранае