Падзеі

19 ліпеня, Мінск /Кар. БЕЛТА/. Намеснік старшыні Савета Рэспублікі, нацыянальны каардынатар па дасягненні Мэт устойлівага развіцця Мар'яна Шчоткіна 18 ліпеня ў штаб-кватэры ААН у Нью-Ёрку прыняла ўдзел у агульнай дыскусіі міністэрскага сегмента палітычнага форуму высокага ўзроўню па ўстойлівым развіцці. Аб гэтым БЕЛТА паведамілі ў МЗС Беларусі.

Мар'яна Шчоткіна азнаёміла ўдзельнікаў форуму з захадамі, зробленымі краінай для ажыццяўлення новага парадку дня ў галіне развіцця. У прыватнасці, яна адзначыла заснаванне Прэзідэнтам Беларусі пасады нацыянальнага каардынатара па дасягненні МУР, а таксама стварэнне нацыянальнага савета па ўстойлівым развіцці на ўзроўні кіраўніцтва профільных органаў дзяржаўнага кіравання і рэгіёнаў краіны.

Прадстаўнік Беларусі падкрэсліла намер рэспублікі задзейнічаць у ажыццяўленні Мэт устойлівага развіцця механізм парламенцкіх слуханняў і нацыянальных кансультацый з удзелам шырокага кола партнёраў, уключаючы грамадзянскую супольнасць. "Беларусь прадставіла свае падыходы да выканання МУР у нацыянальным дакладзе на гэтым форуме і зацікаўлена ва ўкараненні лепшага вопыту іншых краін і рэгіёнаў у рамках выканання Парадку 2030. Не апошнюю ролю ў дасягненні МУР адыгрывае міжнародная дапамога. ААН можа і прызначана служыць для зацікаўленых краін цэнтрам каардынацыі такой дапамогі. Дасягненне амбіцыйных мэт магчыма толькі пры інтэграцыі і разумнай каардынацыі намаганняў", - заявіла яна.

Кіраўнік беларускай дэлегацыі прыцягнула ўвагу ўдзельнікаў форуму да праблем краін з сярэднім узроўнем даходу, без вырашэння якіх немагчыма дасягнуць Мэт устойлівага развіцця. "Як краіна з сярэднім узроўнем даходу Беларусь выступае за больш скаардынаваную падтрымку намаганняў у галіне развіцця гэтай катэгорыі краін, - сказала Мар'яна Шчоткіна. - Прапануем прыняць асобны план дзеянняў ААН па рабоце з краінамі з сярэднім даходам па прыкладзе аналагічных планаў для іншых катэгорый дзяржаў, якія сталі на шлях развіцця, а таксама распрацаваць крытэрыі, якія выходзяць за рамкі толькі даходу на душу насельніцтва".

Была адзначана таксама важнасць рэгіянальных структур як сувязнага звяна ў дзейнасці на глабальным і нацыянальным узроўнях і прапанавана выкарыстаць пляцоўку Еўрапейскай эканамічнай камісіі ААН для абмеркавання шляхоў узаемадзеяння інтэграцыйных аб'яднанняў рэгіёна. "Неабходна пазбегнуць непатрэбнага і небяспечнага проціборства інтэграцыйных мадэлей, дабіцца іх сумяшчальнасці і ўзаемадапаўняльнасці. Узаемавыгаднае супрацоўніцтва інтэграцыйных аб'яднанняў на прасторы еўразійскага кантынента мае выключна важнае значэнне для глабальнай палітычнай стабільнасці і працвітання", - падкрэсліла нацыянальны каардынатар.

У дзень правядзення форуму Мар'яна Шчоткіна дала інтэрв'ю Радыё ААН. У ім яна заявіла, што выкананне Парадку 2030 і дасягненне Мэт устойлівага развіцця - гэта глабальная задача, якая можа быць выканана толькі пры добрай канструктыўнай кааперацыі, інтэграцыі і супрацоўніцтве абсалютна ўсіх дзяржаў.

"Для дасягнення гэтых мэт заўсёды вельмі важна палітычная воля. І тое, што менавіта гэты працэс знаходзіцца пад кантролем Прэзідэнта, з'яўляецца гарантыяй таго, што рух будзе па пэўным вектары і толькі наперад па дасягненні Мэт устойлівага развіцця, - звярнула ўвагу кіраўнік беларускай дэлегацыі. - Мы плануем у гэтым годзе, што пасля пэўных напрацовак, пэўных рухаў па дасягненні Мэт устойлівага развіцця зробім парламенцкія слуханні і прааналізуем сітуацыю для сябе і тое, як мы будзем рухацца далей".

Як кіраўнік Беларускага саюза жанчын Мар'яна Шчоткіна расказала і аб гэтай сферы, паколькі яна таксама з'яўляецца часткай Мэт устойлівага развіцця ААН. У Беларусі шмат увагі ўдзяляецца занятасці жанчын. "Увага ўдзяляецца развіццю жаночага прадпрымальніцтва. Гэта задача стаіць не толькі перад урадам, але і перада мной і Беларускім саюзам жанчын. Мы самі сабе таксама паставілі задачу садзейнічаць развіццю жаночага прадпрымальніцтва і да гэтай работы прыцягваем і жаночыя асацыяцыі іншых дзяржаў", - адзначыла яна.

На палях форуму ААН Мар'яна Шчоткіна правяла таксама сустрэчу з кіраўніком дэлегацыі Азербайджана, намеснікам прэм'ер-міністра гэтай краіны Алі Ахмедавым. Абмеркаваны пытанні двухбаковага супрацоўніцтва, у тым ліку ў кантэксце дасягнення Мэт устойлівага развіцця, і дасягнуты дамоўленасці аб цесным узаемадзеянні на ўзроўні нацыянальных саветаў па дасягненні МУР.