Падзеі

Рыжанкоў: Беларусь нязменна разглядае Турцыю як важнага партнёра і надзейнага сябра

Фота з архiва

30 кастрычніка, Мінск /Кар. БЕЛТА/. Беларусь нязменна разглядае Турцыю не толькі ў якасці важнага і перспектыўнага партнёра, але і як надзейнага сябра, адносіны з якім правераны часам. Аб гэтым заявіў міністр замежных спраў Беларусі Максім Рыжанкоў 29 кастрычніка на ўрачыстым мерапрыемстве з нагоды 101-й гадавіны абвяшчэння Турэцкай Рэспублікі, перадае карэспандэнт БЕЛТА.

Міністр адзначыў: "І Беларуссю, і Турцыяй кіруюць моцныя лідары, якія ўсе свае справы робяць на карысць сваіх народаў і ў сэрцах якіх знаходзяцца праблемы і лёсы простых людзей. Гэта галоўнае, што нас аб'ядноўвае".

"Мы ўважліва сочым за поспехамі Турцыі і бачым, што да кожнай святочнай даты ваша краіна падыходзіць з новымі значнымі дасягненнямі, - падкрэсліў кіраўнік беларускага МЗС. - Зусім нядаўна мне пашчасціла пабываць у вашай цудоўнай краіне і асабіста пераканацца ў гэтым".

"Сёння Турцыя займае дастойнае месца сярод вядучых сусветных дзяржаў, адыгрывае важную ролю ў рэгіянальных і глабальных працэсах, дэманструючы пры гэтым канструктыўныя падыходы, - адзначыў Максім Рыжанкоў. - Мы з'яўляемся сведкамі каласальных намаганняў кіраўніцтва Турцыі ў вырашэнні пытанняў харчовай бяспекі, пошуку палітыка-дыпламатычных рашэнняў у канфліктных сітуацыях, якіх хапае".

Разам з гэтым міністр звярнуў увагу: "На жаль, свет усё часцей сутыкаецца з вельмі сур'ёзнымі выклікамі, у тым ліку інспіраванымі з-за мяжы. Ад паспяховага процістаяння такім выклікам залежыць непасрэдна здольнасць дзяржаў захоўваць свой суверэнітэт і незалежнасць. Нагадаю, гэта нашы найвышэйшыя каштоўнасці - і Турцыі, і Беларусі. Упэўнены, што Турцыя, як і Беларусь, зможа і далей паспяхова пераадольваць любыя цяжкасці і засцерагчы свае дасягненні ад знешніх замахаў".

"Мінск і Анкара паспяхова развіваюць двухбаковае супрацоўніцтва па напрамках узаемнага інтарэсу. Перакананы, што далейшая рэалізацыя патэнцыялу беларуска-турэцкіх адносін будзе садзейнічаць павышэнню дабрабыту нашых народаў, - адзначыў кіраўнік МЗС. - Паміж нашымі краінамі выбудаваны канструктыўныя і даверныя адносіны: падтрымліваюцца самыя дружалюбныя кантакты паміж  кіраўнікамі дзяржаў, цесна ўзаемадзейнічаюць нашы ўрады, парламенты і ведамствы, дыпламатычныя службы".

"Поплеч мы працуем над падрыхтоўкай шэрага сур'ёзных ініцыятыў і візітаў на высокім узроўні, новымі значнымі крокамі на шляху ўмацавання нашага дыялогу і рэалізацыі інвестпраектаў, - прадоўжыў Максім Рыжанкоў. - Гэтымі важкімі мерапрыемствамі мы хочам падкрэсліць гатоўнасць і нацэленасць на далейшае канструктыўнае ўзаемадзеянне".

версія для друку

зрабіць стартавай

дабавіць у выбранае