Падзеі

Рачкоў выступіў на пасяджэнні Пастаяннага камітэта МПС па справах міру і міжнароднай бяспекі

Сяргей Рачкоў. Фота з архiва

24 кастрычніка, Мінск /Кар. БЕЛТА/. Старшыня Пастаяннай камісіі Савета Рэспублікі па міжнародных справах і нацыянальнай бяспецы 24 кастрычніка ў рамках 147-й Асамблеі Міжпарламенцкага саюза (МПС) у Луандзе (Ангола) выступіў на пасяджэнні Пастаяннага камітэта МПС па справах міру і міжнароднай бяспекі. Аб гэтым БЕЛТА паведамілі ў прэс-службе верхняй палаты парламента.

Парламентарыі правялі панэльную дыскусію на тэму "Інструменты для парламентарыяў для ўключэння ў дыялог, заканатворчасць, узмацненне наглядных функцый у імя міру".

Пастаянны камітэт праводзіць работу па імплементацыі рэзалюцыі "Пераасэнсаванне падыходу да мірных працэсаў з мэтай умацавання працяглага міру", прынятай на 144-й Асамблеі ў Інданезіі, праз серыю анлайн-мерапрыемстваў, праведзеных сумесна з партнёрскімі арганізацыямі па пытаннях міру і бяспекі. Такія мерапрыемствы даюць магчымасць прадставіць экспертныя меркаванні, перадавую нацыянальную і міжнародную практыку і вопыт у канкрэтнай сферы, разгледзець актуальныя пытанні з розных ракурсаў, а таксама абмяняцца меркаваннямі.

У выніку істотна ўзбагачаецца арсенал парламенцкіх інструментаў па пашырэнні новых падыходаў да мірнага працэсу.

У выступленні на панэльнай дыскусіі Сяргей Рачкоў звярнуў увагу на тое, што сёння мы назіраем геапалітычны падзел свету, маштабны, сістэмны крызіс у ваенна-палітычнай, эканамічнай і гуманітарнай сферах. Узмацняюцца рознагалоссі паміж асноўнымі сусветнымі цэнтрамі сілы, міжблокавае процістаянне. Удасканальваюцца формы і метады вядзення войнаў і ваенных канфліктаў, распаўсюджана гібрыднае ўздзеянне, тэхналогіі "разумнай сілы" для рэалізацыі каляровых рэвалюцый. Разбураецца архітэктура міжнароднай бяспекі, ігнаруюцца ключавыя міжнародныя дагаворы і пагадненні па пытаннях раззбраення і кантролю над узбраеннямі.

У сувязі з гэтым сенатар заклікаў міжнародныя парламенцкія структуры выступіць з ініцыятывамі па наладжванні канструктыўнага, узаемапаважлівага і раўнапраўнага супрацоўніцтва ў мэтах процідзеяння эскалацыі міжнароднай напружанасці. Сяргей Рачкоў заклікаў кожнага парламентарыя ўнесці асабісты ўклад у стварэнне ўмоў для шырокага ўзаемадзеяння парламенцкіх структур.

Беларускі парламентарый падкрэсліў, што пры пашырэнні новых падыходаў да мірнага працэсу асноўны фокус увагі парламентарыяў павінен быць звернуты на прынцыпы шматбаковасці і супрацоўніцтва. Сур'ёзнай перашкодай для эфектыўнай рэалізацыі названых прынцыпаў з'яўляецца прымяненне аднабаковых прымусовых мер у адносінах да суверэнных дзяржаў.

"Санкцыйная палітыка, якая супярэчыць статуту ААН, наносіць урон працэсу шматбаковасці, у тым ліку дзейнасці палітычных механізмаў і інстытутаў па прадухіленні і рэгуляванні канфліктаў мірнымі сродкамі, падрывае правы найбольш слабаабароненых слаёў насельніцтва, у тым ліку ў сферы справядлівага ўдзелу ў палітычным і сацыяльна-эканамічным жыцці, парушае іх псіха-сацыяльны дабрабыт", - рэзюмаваў парламентарый.

Сяргей Рачкоў адзначыў таксама, што задача парламентарыяў бачыцца ў стварэнні надзейнай і празрыстай заканадаўчай базы для рэгулявання пытанняў бяспекі на цэласнай, міжсектаральнай аснове як унутры краіны, так і за мяжой, канструктыўным удзеле ў дзейнасці, накіраванай на замацаванне і падтрыманне мірных намаганняў, з актыўным выкарыстаннем рэсурсу парламенцкай дыпламатыі.

23 кастрычніка адбылося адкрыццё 147-й Асамблеі МПС у Луандзе. У ходзе інаўгурацыйнай цырымоніі выступілі Прэзідэнт Рэспублікі Ангола Жуан Ларэнсу, Старшыня Нацыянальнай асамблеі Анголы Караліна Серкейра ў прысутнасці дзясяткаў спікераў парламентаў і соцень заканадаўцаў прыкладна са 120 краін.

24 кастрычніка Сяргей Рачкоў таксама прыняў удзел у пасяджэнні Кансультатыўнай групы высокага ўзроўню Міжпарламенцкага саюза па процідзеянні тэрарызму і насільнаму экстрэмізму, членам якой ён з'яўляецца. У ходзе сустрэчы абмеркаваны пытанні развіцця краін рэгіёна Сахель, схільных да ўплыву тэрарызму і насільнага экстрэмізму.

Выпрацоўка канкрэтных рашэнняў па праблемах рэгіёна Сахель - сярод ключавых задач работы Кансультатыўнай групы высокага ўзроўню Міжпарламенцкага саюза па процідзеянні тэрарызму і насільнаму экстрэмізму.

версія для друку

зрабіць стартавай

дабавіць у выбранае