Падзеі

11 жніўня, Брэст /Юлія Дылянок - БЕЛТА/. Будаўніцтва аб'ектаў, якія ўзводзяцца ў Брэсце да святкавання 1000-годдзя горада, плануецца завяршыць не пазней за верасень 2019 года. Аб гэтым Прэзідэнту Беларусі Аляксандру Лукашэнку далажыў старшыня Брэсцкага гарадскога выканаўчага камітэта Аляксандр Рагачук, перадае карэспандэнт БЕЛТА.

"Работа народнагаспадарчага комплексу горада дазваляе рэалізоўваць будаўнічыя і інфраструктурныя праекты, у тым ліку ў рамках святкавання 1000-годдзя. Калі гаварыць аб старой частцы горада, то тут, як правіла, інфраструктурныя аб'екты. А вось у "зарэчнай" частцы ў сярэдзіне 1990 гадоў было 40 тыс. насельніцтва, цяпер тут жывуць 90 тыс., з якіх 20 тыс. дзяцей. Таму асноўны акцэнт мы зрабілі на фарміраванні сацыяльнай інфраструктуры. Да 2020 года тут будуць жыць 110 тыс. чалавек", - сказаў Аляксандр Рагачук.

Асобна ён спыніўся на будаўніцтве самага вялікага інфраструктурнага аб'екта - Заходняга абходу. Яно вядзецца ў адпаведнасці з указам ад 5 студзеня 2012 года нумар 11 "Аб будаўніцтве Заходняга абходу г. Брэста". У 2014 годзе быў уведзены ў эксплуатацыю першы пускавы комплекс - мост праз раку Мухавец. Таксама былі часткова рэканструяваны бліжэйшыя транспартныя развязкі, Варшаўская шаша. Заходні абход дасць магчымасць аптымізаваць транспартныя патокі паміж левым і правым берагам ракі Мухавец. У перспектыве магістраль злучыць аўтадарогі Р17 Брэст - граніца Украіны і М1 Брэст - Мінск - граніца Расіі, а таксама міжнародныя аўтамабільныя пагранічныя пункты пропуску "Брэст - Цярэспаль" і "Казловічы - Кукурыкі". "Лічу, што рэалізацыя гэтага праекта - асноўны падарунак да 1000-годдзя для гараджан", - падкрэсліў Аляксандр Рагачук.

Ён расказаў і пра іншыя аб'екты, у тым ліку пра Кобрынскі пуцеправод. "Мост пабудаваны ў пачатку ХХ стагоддзя, вельмі вузкі. Калі ідуць насустрач два тралейбусы і сустракаюцца, то легкавым машынам не застаецца месца. Мы пачалі падрыхтоўчы этап будаўніцтва, выносім камунікацыі. Ідзём з апярэджаннем", - растлумачыў старшыня гарвыканкама.

Акрамя таго, запланавана ўзвядзенне новага аўтавакзала. "Гістарычна аўтавакзал аказаўся ў старой частцы горада, ён заціснуты вузкімі вуліцамі. Таму прынята рашэнне прапрацаваць пытанне. На гэты момант мы ўжо выйшлі з праектным рашэннем, якім прадугледжваецца будаўніцтва аўтавакзала практычна праз чыгунку з існуючым чыгуначным вакзалам. Будзе добрая лагістыка", - сказаў Аляксандр Рагачук.

Адносна фінансавання будаўніцтва аб'ектаў Аляксандр Рагачук канстатаваў, што праблем няма. "Прычым выкарыстоўваюцца не толькі бюджэтныя сродкі: мы сумесна з Беларускай федэрацыяй футбола будуем футбольны манеж. Агульны кошт - $8 млн", - расказаў ён.

Прэзідэнт паабяцаў праверыць, наколькі выкананыя работы будуць адпавядаць прадстаўленаму праекту.