Падзеі

Праект абноўленага Падатковага кодэкса ўнясуць у парламент у 2020 годзе

Фота з архiва

21 мая, Мінск /Кар. БЕЛТА/. Праект закона па змяненні Падатковага кодэкса ўнясуць у парламент у 2020 годзе. Аб гэтым сёння, адказваючы на пытанні дэпутатаў, паведаміў намеснік міністра фінансаў Дзмітрый Кійко, перадае карэспандэнт БЕЛТА.

Намеснік міністра сказаў, што, у адпаведнасці з планам законапраектнай дзейнасці, унясенне праекта па змяненні ПК прадугледжана ў гэтым годзе.

Паводле слоў Дзмітрыя Кійко, праект прадугледжвае, у прыватнасці, карэкціроўку асобных ставак дзяржаўнай пошліны, парадку яе спагнання і вяртання пры звароце ў суд.

Сумесна з Вярхоўным судом, Генеральнай пракуратурай, іншымі зацікаўленымі напрацаваны напрамкі ў гэтай частцы. "Яны гатовы ў выглядзе асобнага пакета. Мы плануем уключыць яго ў праект закона па змяненні Падатковага кодэкса", - праінфармаваў намеснік міністра.

У парламенце Дзмітрый Кійко прадставіў змяненні ў Грамадзянскі і Гаспадарчы працэсуальны кодэксы. Папраўкі накіраваны на аптымізацыю выплаты дзяржпошліны пры звароце ў суд. Сутнасць паправак у тым, што пры звароце ў суд замест папяровай квітанцыі аб выплаце дзяржпошліны дазволяць пазначаць уліковы нумар аперацыі ў АРІП. Такім чынам у практыку ўкараняюцца элементы электроннага судаводства.

Усяго Палата прадстаўнікоў разгледзела сёння 10 пытанняў. У прыватнасці, другое чытанне прайшлі папраўкі ў законы па пытаннях валютнага рэгулявання і валютнага кантролю. Як адзначаў раней у гутарцы з карэспандэнтам БЕЛТА намеснік старшыні Пастаяннай камісіі па бюджэце і фінансах Пётр Вабішчэвіч, прыняцце закона стане чарговым крокам па стварэнні новай мадэлі валютнага рэжыму. Сярод асноўных навацый - скарачэнне дазволеных выпадкаў выкарыстання на тэрыторыі Беларусі замежнай валюты, вызначаецца іх выключны пералік. За суб'ектамі гаспадарання замацавана права набываць замежную валюту праз банкі або на біржы без дэкларавання мэт яе далейшага выкарыстання. Юрыдычныя асобы-рэзідэнты змогуць самі вызначаць тэрміны залічэння валютнай выручкі на свае рахункі, адкрытыя як у беларускіх, так і замежных банках. Выключаецца працэдура выдачы Нацыянальным банкам дазволаў на правядзенне валютных аперацый у выпадках, калі валютным заканадаўствам іх правядзенне не дапускаецца. Акрамя таго, у законапраекце замацавана права Нацбанка сумесна з Саветам Міністраў на ўвядзенне не больш як на адзін год валютных абмежаванняў пры ўзнікненні крызісных сітуацый.

версія для друку

зрабіць стартавай

дабавіць у выбранае