Падзеі

Прадстаўніцтва Курчатаўскага інстытута адкрылася ў Мінску

29 сакавіка, Мінск /Кар. БЕЛТА/. Прадстаўніцтва расійскага Нацыянальнага даследчага цэнтра "Курчатаўскі інстытут" адкрылася 29 сакавіка ў Мінску на базе Нацыянальнай акадэміі навук, перадае карэспандэнт БЕЛТА.

"Супрацоўніцтва актыўна развіваецца. Цяпер адбываецца працэс афіцыйнага ўступлення Беларусі ў Міжнародны цэнтр нейтронных даследаванняў на базе высокапаточнага рэактара ПІК у Гатчыне. Адкрыццё прадстаўніцтва Курчатаўскага інстытута ў Мінску таксама дасць магчымасць нам пашырыць узаемадзеянне. Тут запланавана некалькі лабараторый, якія будуць адлюстроўваць нашы прыярытэты навукова-тэхналагічнага развіцця", - сказаў прэзідэнт НДЦ "Курчатаўскі інстытут" Міхаіл Кавальчук.

Ён падкрэсліў, што беларуская навука знаходзіцца на вельмі высокім узроўні. "Відавочныя моцныя бакі, якія ўяўляюць цікавасць і для РФ. Першае - мікраэлектроніка. Сёння гэта адзін з важнейшых прыярытэтаў, асабліва для машынабудавання. Другое - сельская гаспадарка, генетыка для раслінаводства, жывёлагадоўлі, аквакультур. Трэцяе - матэрыялазнаўства, у тым ліку для космасу. Чацвёртае - ядзерныя тэхналогіі, у тым ліку ядзерная медыцына. Плануем тут іх актыўна развіваць. І яшчэ адзін напрамак - кагнітыўныя і сацыягуманітарныя даследаванні, у тым ліку тыя, што датычацца гістарычнай спадчыны", - адзначыў кіраўнік Курчатаўскага інстытута.

Адкрыццё прадстаўніцтва ў Мінску адбылося ў час кангрэса маладых вучоных Беларусі і Расіі. Рашэнне аб правядзенні кангрэса было прынята прэзідэнтамі Беларусі і Расійскай Федэрацыі ў снежні 2022 года. Ён прымеркаваны да Дня яднання народаў Беларусі і Расіі.

У кангрэсе прымаюць удзел маладыя даследчыкі навуковых арганізацый, вышэйшых навучальных устаноў дзвюх краін. Ад РФ - прадстаўнікі Нацыянальнага даследчага цэнтра "Курчатаўскі інстытут", а таксама Расійскай акадэміі навук, у тым ліку Санкт-Пецярбургскага навуковага цэнтра, Сібірскага і Далёкаўсходняга аддзяленняў.

29 сакавіка прайшло пленарнае пасяджэнне "Маладыя вучоныя: задачы і напрамкі ўзаемадзеяння для стварэння адзінай навукова-тэхналагічнай прасторы Беларусі і Расіі". На ім абмяркоўвалі прыярытэтныя напрамкі развіцця міжнароднага навукова-тэхнічнага супрацоўніцтва маладых вучоных дзвюх краін.

версія для друку

зрабіць стартавай

дабавіць у выбранае