Падзеі

У штаб-кватэры ААН у Нью-Ёрку 5 чэрвеня пачала работу 57-я сесія Камітэта ААН па праграме і каардынацыі. Яна прадоўжыцца да 30 чэрвеня. Намеснікам старшыні камітэта выбраны намеснік начальніка галоўнага ўпраўлення шматбаковай дыпламатыі МЗС Беларусі Вадзім Пісарэвіч.

Камітэт у ходзе сесіі разгледзіць стратэгічныя рамкі дзейнасці ААН на перыяд 2018-2019 гадоў і дасць ацэнку выкананню бягучых праграм арганізацыі.

У склад Камітэта па праграме і каардынацыі ўваходзіць 31 дзяржава - член Арганізацыі Аб'яднаных Нацый, ён з'яўляецца асноўным дапаможным органам Эканамічнага і сацыяльнага савета і Генеральнай Асамблеі па планаванні, складанні праграм і каардынацыі адміністрацыйна-бюджэтнай дзейнасці ААН. Беларусь выбрана ў склад КПК ААН на перыяд 2015-2017 гадоў. У задачы КПК уваходзіць вывучэнне выканання праграм дзейнасці ААН, у тым ліку з пункту гледжання бюджэтных наступстваў, ацэнка дасягнутых вынікаў, унясенне ў выпадку неабходнасці рэкамендацый аб парадку чарговасці і ўдасканаленні метадаў ажыццяўлення і каардынацыі праграмнай дзейнасці ў сістэме ААН.