Падзеі

26 ліпеня, Мінск /Кар. БЕЛТА/. Польшча настроена на выбудоўванне палітыкі добрасуседства з Беларуссю. Аб гэтым БЕЛТА паведамілі ў прэс-службе Палаты прадстаўнікоў па выніках сустрэчы віцэ-спікера Баляслава Пірштука з Надзвычайным і Паўнамоцным Паслом Польшчы ў Беларусі Артурам Міхальскім.

На сустрэчы абмяркоўваліся пытанні беларуска-польскага ўзаемадзеяння па парламенцкай лініі, развіцця гандлёва-эканамічнага супрацоўніцтва. Баляслаў Пірштук расказаў аб намаганнях Беларусі па развіцці турыстычнага патэнцыялу і прынятым рашэнні аб павелічэнні тэрміну бязвізавага знаходжання замежных грамадзян да 30 сутак. "Артур Міхальскі ў сваю чаргу акцэнтаваў увагу на важнасці выбудоўвання палітыкі добрасуседства і выключэння элемента недаверу з адносін паміж дзвюма краінамі. Ён адзначыў важнасць рашэння беларускага боку па пашырэнні бязвізавага рэжыму для развіцця кантактаў паміж людзьмі", - праінфармавалі ў прэс-службе.

Бакі абмеркавалі таксама перспектывы гандлёва-эканамічнага супрацоўніцтва з улікам вялікага патэнцыялу для росту тавараабароту паміж Беларуссю і Польшчай. Закраналіся далейшыя крокі для пашырэння міжпарламенцкага ўзаемадзеяння, у тым ліку на міжнародных пляцоўках, на ўзроўні рабочых груп па супрацоўніцтве, сфарміраваных у парламентах дзвюх краін.