Падзеі

Першая лэдзі Зімбабвэ знаходзіцца ў Мінску з візітам, адбылася яе сустрэча з кіраўніком МЗС Беларусі

5 красавіка, Мінск /Кар. БЕЛТА/. Міністр замежных спраў Беларусі Сяргей Алейнік правёў сустрэчу з жонкай Прэзідэнта Зімбабвэ Аксіліяй Мнангагва. Яе візіт праходзіць у адпаведнасці з дамоўленасцямі, дасягнутымі паміж прэзідэнтамі Беларусі і Зімбабвэ ў час дзяржаўнага візіту Аляксандра Лукашэнкі ў Харарэ, паведамляе БЕЛТА са спасылкай на прэс-службу МЗС нашай краіны.

Сяргей Алейнік з цеплынёй вітаў Аксілію Мнангагву ў Мінску, адзначыўшы важнасць яе прыезду для плённага развіцця двухбаковых адносін, асабліва ў гуманітарнай сферы. Ён падкрэсліў, што ў час візіту беларускага лідара ў Харарэ былі дасягнуты гістарычна значныя дамоўленасці, дзякуючы якім павінен адбыцца сапраўдны прарыў у развіцці ўзаемадзеяння па шырокім спектры розных напрамкаў. Цяпер справа за ўрадамі і міністэрствамі, якім трэба будзе ўвасобіць у жыццё ўсе дамоўленасці.

Міністр звярнуў увагу на тое, што паміж Беларуссю і Зімбабвэ склаліся трывалыя палітычныя сувязі, узмацняецца эканамічнае супрацоўніцтва. Таксама дасягнуты дамоўленасці па развіцці ўзаемадзеяння ў гуманітарнай сферы, на чым і будзе зроблены акцэнт ў час візіту першай лэдзі Зімбабвэ ў Беларусь.

Ключавымі тэмамі ў час візіту першай лэдзі Зімбабвэ стануць пытанні аховы здароўя, медыцынскай навукі, аховы мацярынства і дзяцінства.

Як паведамлялася, Прэзідэнт Беларусі Аляксандр Лукашэнка па выніках дзяржаўнага візіту ў Зімбабвэ не раз заяўляў аб гатоўнасці пашыраць супрацоўніцтва з гэтай краінай, выконваючы ўсе раней дасягнутыя дамоўленасці і адкрываючы новыя сферы. "Мы намецілі спецыяльны план нашай работы з Зімбабвэ і гатовы строга прытрымлівацца рэалізацыі гэтых планаў і заданняў. У нас былі новыя напрамкі нашага супрацоўніцтва. Перш за ўсё ў гуманітарнай сферы. Я ўжо не кажу пра адукацыю, - адзначаў кіраўнік дзяржавы 28 сакавіка на сустрэчы з міністрам замежных спраў і міжнароднага гандлю Зімбабвэ Фрэдэрыкам Шавам. - Мы са спадаром Мнангагвам дамовіліся, што ўдзелім вялікую ўвагу супрацоўніцтву ў сферы мацярынства, дзяцінства, аховы здароўя, дзіцячага харчавання. І я спадзяюся, што ў бліжэйшы час тут будзе жонка Прэзідэнта, якой даручана з боку Зімбабвэ займацца гэтым пытаннем. Вы павінны ведаць, што мы зробім максімальна магчымае для таго, каб аказаць тут дапамогу і падтрымку нашым сябрам у Зімбабвэ. Можаце на нас у гэтым плане разлічваць".

версія для друку

зрабіць стартавай

дабавіць у выбранае