Падзеі

28 мая, Мінск /Кар. БЕЛТА/. Парламентарыі разлічваюць надаць новы імпульс сацыяльным праектам Беларусі і Вялікабрытаніі. Аб гэтым сёння журналістам паведаміў кіраўнік рабочай групы Нацыянальнага сходу Беларусі па супрацоўніцтве з парламентам Вялікабрытаніі і Паўночнай Ірландыі, член Пастаяннай камісіі Савета Рэспублікі па міжнародных справах і нацыянальнай бяспецы Алег Румо, перадае карэспандэнт БЕЛТА.

Алег Румо адзначыў, што парламентарыі бачаць вялікі спектр напрамкаў для развіцця двухбаковых адносін. Размова ідзе аб эканоміцы, фінансах, сацыяльных праектах, якія Беларусь і Вялікабрытанія рэалізуюць ужо даволі доўгі час. "Мы можам надаць новы імпульс развіццю гэтага супрацоўніцтва", - лічыць сенатар. Сярод іншых перспектыўных сфер ён назваў навуку, медыцыну, культуру. Для Беларусі з улікам пераходу да лічбавай эканомікі важна ўмацоўваць міжнароднае ўзаемадзеянне ў ІТ. Гэта важны спектр пытанняў, у вырашэнні якіх парламентарыі могуць быць карысныя, упэўнены Алег Румо.

Кіраўнік міжпартыйнай групы па Беларусі парламента Вялікабрытаніі, дэпутат Джон Вітынгдэйл у сваю чаргу выказаў надзею на актыўнае развіццё адносін з беларускімі калегамі. Ён разлічвае, што візіт у Беларусь парламенцкай дэлегацыі, які праходзіць гэтымі днямі, стане вельмі плённым і дасць магчымасць намеціць новыя шляхі для кааперацыі.

Дэлегацыя сустрэлася сёння са старшынёй Савета Рэспублікі Міхаілам Мясніковічам. Брытанскія парламентарыі правялі таксама перагаворы з членамі рабочай групы Нацыянальнага сходу па супрацоўніцтве з парламентам Вялікабрытаніі.