Падзеі

Парламент МЕРКОСУР зацікаўлены супрацоўнічаць з Нацыянальным сходам Беларусі

Фота Палаты прадстаўнікоў

14 лютага, Мінск /Кар. БЕЛТА/. Намеснік старшыні Палаты прадстаўнікоў Валерый Міцкевіч прыняў удзел у XXXVI Генеральнай асамблеі Лацінаамерыканскага парламента (ПАРЛАЦІНА), якая праходзіла 11-12 лютага ў Панаме (Рэспубліка Панама). Кіраўнік дэлегацыі Нацыянальнага сходу выступіў з дакладам аб кантактах з Лацінаамерыканскім парламентам у першы дзень асамблеі. Даклад быў успрыняты з вялікай увагай і выклікаў шырокі водгук сярод лацінаамерыканскіх парламентарыяў, паведамілі БЕЛТА ў прэс-службе Палаты прадстаўнікоў.

Пасля першага дня асамблеі прадстаўнікі шэрага нацыянальных дэлегацый выказалі салідарнасць з народам Беларусі, прадэманстравалі супадзенне пазіцый у ацэнцы міжнароднай сітуацыі і пацвердзілі гатоўнасць разам процістаяць палітыцы дыктату, двайных стандартаў і санкцый. У гутарках лацінаамерыканскія калегі высока ацанілі агульнанацыянальны дыялог, арганізаваны ў Беларусі для выпрацоўкі стратэгіі сацыяльна-палітычных пераўтварэнняў.

Валерый Міцкевіч закрануў і тэмы Вялікай Айчыннай вайны, абароны гістарычнай праўды дзеля захавання міру на планеце.

Асаблівую цікавасць лацінаамерыканскія калегі выказалі да эканамічных магчымасцей Беларусі і перспектыў паглыблення дружалюбных сувязей з нашай краінай. Зацікаўленасць у развіцці ўзаемаадносін паміж парламенцкімі структурамі выказаў генеральны дырэктар сакратарыята парламента МЕРКОСУР (парламент Паўднёваамерыканскага агульнага рынку) Дыега Куінас. На сустрэчы бакі расказалі адзін аднаму аб магчымасцях і перавагах сваіх рынкаў. Прагучала прапанова абмяняцца візітамі і разгледзець магчымасць пагаднення аб супрацоўніцтве паміж Нацыянальным сходам Беларусі і парламентам МЕРКОСУР.

МЕРКОСУР мае несумненную цікавасць з пункту гледжання пашырэння беларускіх гандлёва-эканамічных інтарэсаў у паўднёваамерыканскім рэгіёне. Тут сканцэнтравана 55,3 працэнта насельніцтва краін Лацінскай Амерыкі і Карыбскага басейна, 40 працэнтаў прамых замежных інвестыцый, 33 працэнты аб'ёму знешняга гандлю краін рэгіёна. Сукупны ВУП удзельнікаў аб'яднання дасягае $3,3 трлн. Па памерах і эканамічным патэнцыяле аб'яднанне ўяўляе сабой другі пасля ЕС мытны саюз і трэцюю пасля ЕС і НАФТА зону свабоднага гандлю. Пастаянныя члены МЕРКОСУР - Аргенціна, Бразілія, Парагвай, Уругвай і Венесуэла. На правах асацыіраваных членаў у блоку ўдзельнічаюць Балівія, Чылі, Калумбія, Эквадор і Перу.

У аналагічным ключы прайшлі сустрэчы Валерыя Міцкевіча з мексіканскім палітыкам Бланкай Алькала, якая ў 2015-2017 гадах узначальвала ПАРЛАЦІНА, і выбраным на бягучай асамблеі Лацінаамерыканскага парламента старшынёй гэтай арганізацыі Сільвіяй Джакопа, якая прадстаўляе Аргенціну.

Старшыня Палаты прадстаўнікоў парламента Рэспублікі Калумбія Джэніфер Арыяс запрасіла дэлегацыю беларускіх парламентарыяў наведаць Калумбію і выказала зацікаўленасць у наведванні Беларусі. Было адзначана, што Калумбія з насельніцтвам 50 млн - перспектыўны рынак для збыту беларускай прадукцыі і важная прастора пашырэння нацыянальных інтарэсаў.

Вялікую зацікаўленасць у пашырэнні супрацоўніцтва і арганізацыі візіту ў Беларусь выказаў старшыня Вялікага Нацыянальнага сходу Турцыі Мустафа Шэнтоп. У бягучым годзе ён упершыню ў якасці наглядальніка ўдзельнічае ў пасяджэнні Генасамблеі ПАРЛАЦІНА. Ён, у прыватнасці, падкрэсліў, што Турцыя разглядае Беларусь у якасці гаранта стабільнасці ў рэгіёне.

Плённа прайшлі сустрэчы з прадстаўнікамі Нацыянальнай асамблеі народнай улады Кубы, дыялог з якімі будзе прадоўжаны ўжо ў пачатку наступнага тыдня падчас афіцыйнага візіту Валерыя Міцкевіча на Кубу.

Лацінаамерыканскі парламент - рэгіянальная пастаянная арганізацыя краін Лацінскай Амерыкі і Карыбскага басейна. Арганізацыя заснавана 10 снежня 1964 года ў Ліме (Перу). У склад ПАРЛАЦІНА ўваходзяць парламенты 23 дзяржаў і тэрыторый (кожны мае 12 прадстаўнікоў з правам голасу): Аргенціна, в. Аруба, Балівія, Бразілія, Венесуэла, Гватэмала, Гандурас, Дамініканская Рэспубліка, Калумбія, Коста-Рыка, Куба, в. Кюрасаа, Мексіка, Нікарагуа, Панама, Парагвай, Перу, Сальвадор, в. Сан-Марцін, Сурынам, Уругвай, Чылі, Эквадор. ПАРЛАЦІНА ствараўся для гарманізацыі заканадаўства лацінаамерыканскіх краін.

У 2016 годзе ў Мінску падпісана пагадненне аб супрацоўніцтве паміж Нацыянальным сходам і ПАРЛАЦІНА, у адпаведнасці з якім беларускаму парламенту быў прадастаўлены статус пастаяннага наглядальніка. У Нацыянальным сходзе Беларусі сфарміравана дэлегацыя па кантактаў з Лацінаамерыканскім парламентам. Яе ўзначальвае намеснік старшыні Палаты прадстаўнікоў Валерый Міцкевіч.

версія для друку

зрабіць стартавай

дабавіць у выбранае