Падзеі

18 мая, Мінск /Уладзімір Мацвееў - БЕЛТА/. Прэзідэнт Сербіі Таміслаў Нікаліч пасля завяршэння сваіх прэзідэнцкіх паўнамоцтваў можа прадоўжыць курыраваць супрацоўніцтва Беларусі і Сербіі. Аб гэтым ён заявіў сёння на сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.

"Мы з Аляксандрам Вучычам (выбраны Прэзідэнтам Сербіі 2 красавіка 2017 года. - Заўвага БЕЛТА) знаёмы 25 гадоў. Ён праводзіць такую ж палітыку. Таму нічога не зменіцца ў нашых адносінах. Мы дамовіліся з ім і з Прэзідэнтам Расіі, Старшынёй КНР, каб я ўзяў на сябе каардынацыю супрацоўніцтва з Расійскай Федэрацыяй і Кітаем", - заявіў Таміслаў Нікаліч.

Ён адзначыў, што адпаведная яго роля можа быць фармалізавана і адносна Беларусі. "Мы паставілі нашы адносіны на такі высокі ўзровень, што яны ўжо ніколі не змогуць пагоршыцца", - упэўнены Таміслаў Нікаліч.

Прэзідэнт Сербіі падзякаваў за ўзнагароджанне яго ордэнам Дружбы народаў і падкрэсліў асаблівы характар адносін беларускага лідара да гэтай краіны. "Вы наведвалі Сербію ў час бамбардзіровак НАТА. Я тады быў у апазіцыі, але я гэта не забыў і ніколі не забуду. Таму што гэты жэст у вашай асобе - на самай справе жэст беларускага народа, які, як і сербскі, панёс самыя вялікія ахвяры ў Другой сусветнай вайне", - сказаў ён.

"Я таксама быў у апазіцыі, калі прысутнічаў на вашай інаўгурацыі пасля прэзідэнцкіх выбараў (напэўна, размова ідзе аб прэзідэнцкіх выбарах у Беларусі ў 2010 годзе. - Заўвага БЕЛТА). І гэта многія ў Сербіі не разумелі", - адзначыў Таміслаў Нікаліч.

Прэзідэнт Сербіі расказаў, што паспрабаваў зняць пытанне адмоўнага ў асобных аспектах стаўлення да Беларусі, калі наведаў яе адразу пасля выбрання на пасаду кіраўніка дзяржавы. "Тым самым я хацеў паказаць сваё стаўленне да санкцый, якія Еўропа ўвяла адносна Беларусі. І тады мяне спадарыня Эштан (Кэтрын Эштан - з 1 снежня 2009 года па 1 лістапада 2014 года - Вярхоўны прадстаўнік ЕС па замежных справах і палітыцы бяспекі. - Заўвага БЕЛТА) спытала, чаму я еду ў Беларусь, я ёй адказаў: "Было б лепш і для вас, калі б вы часцей ездзілі ў Беларусь", - падкрэсліў Прэзідэнт Сербіі.

"Тады мы ўмацавалі наша эканамічнае супрацоўніцтва і дамовіліся аб яго ўзняцці на значна больш высокі ўзровень", - дадаў ён.

З 2009 па 2015 год тавараабарот паміж дзвюма краінамі вырас у 4,7 раза, перасягнуўшы адзнаку $250 млн. У студзені-сакавіку 2017 года тавараабарот склаў $54,5 млн, што на 25,6 працэнта вышэй у параўнанні з адпаведным перыядам 2016 года. Аб'ём беларускага экспарту ў Сербію павялічыўся на 59,6 працэнта і склаў $28,4 млн.

У Сербіі 2 красавіка адбыліся чарговыя прэзідэнцкія выбары, перамогу ў якіх атрымаў дзеючы старшыня ўрада і лідар кіруючай Сербскай прагрэсіўнай партыі Аляксандр Вучыч. Уступленне на пасаду выбранага Прэзідэнта Сербіі чакаецца 31 мая 2017 года. У гэты ж дзень заканчваюцца паўнамоцтвы Таміслава Нікаліча, які не стаў балаціравацца на другі прэзідэнцкі тэрмін.