Падзеі

МЗС: заявамі пра Беларусь еўрачыноўнікі прыкрываюць уласныя правалы і неабдуманыя рашэнні

Фота з архiва

9 жніўня, Мінск /Кар. БЕЛТА/. Прэс-служба Міністэрства замежных спраў Беларусі выступіла з заявай у сувязі з рэакцыяй Еўрапейскай службы знешніх дзеянняў (ЕСЗД) на чарговую гадавіну прэзідэнцкіх выбараў у Беларусі, паведамляе БЕЛТА.

"Які раз пераконваемся ў бессэнсоўнасці сур'ёзнага разгляду аднатыпных заяў Еўрапейскай службы знешніх дзеянняў і асобных краін - членаў ЕС у сувязі з чарговай гадавінай прэзідэнцкіх выбараў у Рэспубліцы Беларусь. Праўда, на гэты раз еўрачыноўнікі крыху перастараліся і перасягнулі сябе ў падтасоўцы фактаў, якія датычацца заяў Вярхоўнага камісара ААН па правах чалавека ў адносінах да Беларусі. Высакамоўныя фразы аб міфічнай падтрымцы Еўрасаюзам беларускага народа, у тым ліку фінансавай, мы чуем на працягу дзесяцігоддзяў. Беларусы - мудрыя людзі і выдатна бачаць, куды такая нібыта падтрымка завяла іншыя краіны", - звярнулі ўвагу ў прэс-службе.

У МЗС падкрэслілі, што, прытрымліваючыся свайго незалежнага курсу, Беларусь якраз паспяхова развіваецца. Нягледзячы на беспрэцэдэнтны санкцыйны націск, стабільна расце ВУП, рэалізуюцца маштабныя праекты па мадэрнізацыі прамысловасці, забяспечваецца дастойная сацыяльная абарона насельніцтва, расце дабрабыт грамадзян. Толькі за пяць месяцаў 2024 года рэальныя грашовыя даходы насельніцтва павялічыліся на 9,6 працэнта.

"Сітуацыя ж у краінах ЕС выклікае ўсё большую незадаволенасць простых грамадзян, якая часта суправаджаецца актамі грамадзянскага непадпарадкавання. Уяўляецца, што сваімі заявамі ў адносінах да Рэспублікі Беларусь еўрачыноўнікі хацелі б прыкрыць уласныя правалы і неабдуманыя рашэнні ў эканоміцы, энергетычнай сферы, міграцыйнай палітыцы. Аднак складаней за ўсё Еўрасаюзу ўтаіць відавочнае - крызіс ідэй уласнага развіцця і стратэгіі выбудоўвання адносін з суседзямі, у тым ліку і Беларуссю", - заявілі ў прэс-службе.

версія для друку

зрабіць стартавай

дабавіць у выбранае