Падзеі
МЗС уручыла афіцыйную ноту Польшчы з-за інцыдэнту са спробай вярбоўкі беларускага дыпламата ў Малдове
11 снежня, Мінск /Кар. БЕЛТА/. У МЗС Беларусі ўручылі афіцыйную ноту часоваму паверанаму ў справах Польшчы ў Беларусі Кшыштафу Ажанну, перадае карэспандэнт БЕЛТА.
Як паведамлялася раней, польскія спецслужбы спрабавалі за 100 тыс. еўра завербаваць беларускага дыпламата ў Малдове. Прэс-сакратар МЗС Беларусі Анатоль Глаз падкрэсліў, што з пункту гледжання права як унутранага, так і міжнароднага гэта абуральны інцыдэнт. "Парушаецца шэраг норм унутранага заканадаўства. Парушаецца шэраг міжнародных правіл. Парушаюцца нормы Венскай канвенцыі аб дыпламатычных і консульскіх адносінах. Спроба аказання націску ці вярбоўкі дыпламата, паверце, прытым такая нахабная і адкрытая, нават за гранню права, правіл прыстойнасці нармальнага цывілізаванага міждзяржаўнага ўзаемадзеяння. Гэта не можа застацца без рэакцый. З нашага боку падрыхтавана ўжо адпаведная нота ў адрас польскага боку. Мяркую, будзе і шэраг іншых крокаў, над якімі мы самым сур'ёзным чынам думаем. Уся адказнасць за наступствы такіх дзеянняў ляжыць на польскім баку", - адзначыў Анатоль Глаз.
11 снежня ў МЗС Беларусі быў выкліканы часовы павераны ў справах Польшчы ў Беларусі Кшыштаф Ажанна. Польскаму дыпламату была ўручана афіцыйная нота. "Я перадам тое, пра што мы сёння гаварылі, у Варшаву", - адказваючы на пытанні журналістаў, сказаў Кшыштаф Ажанна. Ад іншых каментарыяў дыпламат адмовіўся.
МЗС Беларусі ўказала на недапушчальнасць правакацыйных дзеянняў спецслужбаў Польшчы
12 снежня, Мінск /Кар. БЕЛТА/. У МЗС 11 снежня быў выкліканы часовы павераны ў справах Рэспублікі Польшча ў Рэспубліцы Беларусь Кшыштаф Ажанна. Аб гэтым карэспандэнту БЕЛТА паведамілі ў прэс-службе беларускага знешнепалітычнага ведамства.
Польскаму дыпламату быў заяўлены рашучы пратэст і перададзена адпаведная нота ў сувязі з нядаўняй спробай вярбоўкі прадстаўнікамі польскіх спецслужбаў беларускага дыпламата ў Кішынёве.
Беларускі бок указаў на недапушчальнасць правакацыйных дзеянняў спецслужбаў Польшчы, якія груба парушаюць міжнароднае права і наносяць сур'ёзны ўрон двухбаковым адносінам, і запатрабаваў ад польскага боку прыняць усе неабходныя меры для недапушчэння такіх сітуацый у будучым.
Кіраўнік польскай дыпмісіі быў папярэджаны аб тым, што беларускі бок пакідае за сабой права прыняць мер рэагавання, якія палічыць патрэбнымі.
Прапаноўвалі 100 тыс. еўра. Няўдачная спроба польскіх спецслужбаў завербаваць беларускага дыпламата ў Малдове
11 снежня, Мінск /Кар. БЕЛТА/. Польскія спецслужбы пацярпелі няўдачу пры спробе за 100 тыс. еўра завербаваць беларускага дыпламата ў Малдове. Аб гэтым расказалі ў эфіры тэлеканала "Беларусь 1", паведамляе БЕЛТА.
Як было заяўлена ў тэлеэфіры, вербаваць дыпламата спрабаваў Марцін Грабовіч - ураджэнец горада Слупск. Пасля заканчэння ўніверсітэта прыняты на службу ў Агенцтва ўнутранай бяспекі Польшчы. Асноўныя напрамкі работы - Расія, Беларусь і Украіна. Далей паступіў на службу ў Агенцтва разведкі Польшчы. Скончыў курсы па баявой падрыхтоўцы ў Ізраілі. Працаваў пад прыкрыццём у МЗС Польшчы па лініі падраздзялення дыпламатычнай бяспекі. Кіраваў рэгіянальнай рэзідэнтурай у Літве і Латвіі. З канца 2021 года да гэтага часу - афіцыйны прадстаўнік Агенцтва разведкі Польшчы ва Украіне. Мае воінскае званне палкоўнік.
Грабовіч прапанаваў беларускаму дыпламату сустрэцца ў адным з рэстаранаў Кішынёва. Там ён паведаміў, што ў яго ёсць падарунак, але ён забыў яго ў гасцініцы. Далей паляк запрасіў дыпламата ў нумар, дзе дастаў з сумкі 100 тыс. еўра купюрамі па 100 еўра. Затым да размовы далучыўся яго калега, які назваўся Паўлам Новакам і таксама прадстаўніком Агенцтва разведкі Польшчы. Сваіх "вярбоўшчыкаў" дыпламат зняў на камеру мабільнага тэлефона.
Як стала вядома, палякі зарэзервавалі нумары ў гасцініцы з панядзелка па пятніцу. Аднак ужо на наступны дзень пасля няўдачнай вярбоўкі зніклі пасля абеду. Не здалі нават ключы на рэсэпшэн.
МЗС Беларусі ў сувязі з гэтай сітуацыяй растлумачыла, што ў адрас Польшчы падрыхтавана нота, магчымы і іншыя крокі.
"З пункту гледжання права як унутранага, так і міжнароднага гэта абуральны інцыдэнт. Парушаецца шэраг норм унутранага заканадаўства. Парушаецца шэраг міжнародных правіл. Прама парушаюцца нормы Венскай канвенцыі аб дыпламатычных і консульскіх зносінах. Спроба аказання націску або вярбоўкі дыпламата, паверце, прытым такая нахабная і адкрытая, нават за гранню права, правіл прыстойнасці нармальных цывілізаваных міждзяржаўных зносін. Гэта не можа застацца без рэакцый. З нашага боку падрыхтавана ўжо адпаведная нота ў адрас польскага боку. Лічу, будуць і шэраг іншых крокаў, над якімі мы самым сур'ёзным чынам думаем. Уся адказнасць за наступствы такіх дзеянняў ляжыць на польскім боку", - падкрэсліў прэс-сакратар МЗС Беларусі Анатоль Глаз.
"Гэта злачынства супраць дзяржавы". КДБ пра вярбоўку польскімі спецслужбамі беларускага дыпламата
11 снежня, Мінск /Кар. БЕЛТА/. Спроба польскіх спецслужбаў завербаваць беларускага дыпламата - абуральны выпадак, злачынства супраць дзяржавы, якому будзе дадзена прынцыповая прававая ацэнка, заявіў у эфіры тэлеканала "Беларусь 1" начальнік Следчага ўпраўлення КДБ Беларусі Канстанцін Бычак, паведамляе БЕЛТА.
Польскія спецслужбы пацярпелі няўдачу пры спробе завербаваць беларускага дыпламата ў Малдове. Цана пытання - 100 тыс. еўра.
"Гэта чарговая спроба з боку польскіх спецслужбаў прыкрыць уласны непрафесіяналізм на фоне шэрага гучных правалаў іх агентуры на тэрыторыі Рэспублікі Беларусь, - адзначыў Канстанцін Бычак. - Вярбовачны падыход да дзеючага дыпламата - гэта абуральны выпадак. Таму на гэта адназначна будзе адпаведная рэакцыя беларускага боку. А з улікам таго, што ў дзеяннях супрацоўнікаў польскіх спецслужбаў ёсць прыкметы злачынства супраць дзяржавы, з боку Следчага ўпраўлення КДБ ім будзе дадзена прынцыповая прававая ацэнка".
Нядаўна на "Беларусь 1" паказалі фільм "Контрразведка КДБ Беларусі супраць спецслужбаў Польшчы". Як удакладнілі ў тэлеэфіры, шэраг медыярэсурсаў зрабілі даволі цікавае выказванне аб тым, што Беларусь збіраецца абмяняць замежных грамадзян, што знаходзяцца ў турмах за шпіянаж, на грамадзян Беларусі, якія знаходзяцца ў турмах за мяжой.
"Сапраўды, у Рэспубліцы Беларусь у месцах пазбаўлення волі адбывае пакаранне вялікая колькасць замежных грамадзян, у тым ліку грамадзян Польшчы, краін Балтыі, іншых краін Захаду за супрацоўніцтва са спецслужбамі замежных дзяржаў. Гэтыя асобы - асуджаныя за шпіянаж або агентурную дзейнасць. Іх вінаватасць устаноўлена ўступіўшымі ў законную сілу прыгаворамі судоў на падставе неабвержных доказаў, у тым ліку іх прызнальных паказанняў, - падкрэсліў Канстанцін Бычак. - Сапраўды, на нас рэгулярна выходзяць прадстаўнікі замежных спецслужбаў з прапановай абмяняць гэтых асоб на грамадзян Рэспублікі Беларусь, якія знаходзяцца ў іх турмах. Пры гэтым для абмену яны прапануюць грабежнікаў, гвалтаўнікоў, наркаманаў, махляроў і іншых. У сувязі з гэтым афіцыйная пазіцыя камітэта - мы нікога не мяняем. Ні ў Польшчы, ні ў краінах Балтыі, ні ў іншых краінах Захаду няма грамадзян Рэспублікі Беларусь, якія супрацоўнічалі з КДБ, асуджаны за гэта і адбываюць там пакаранне".
версія для друку
зрабіць стартавай
дабавіць у выбранае