Падзеі

Дзяржаўным пагранічным камітэтам Беларусі атрымана афіцыйная інфармацыя аб тым, што з 15 мая 2017 года расійскі бок у авіяцыйных пунктах пропуску будзе ажыццяўляць пагранічны кантроль адносна паветраных суднаў, што прыбываюць з Беларусі і накіроўваюцца ў зваротным напрамку, у тым ліку пасажыраў. У гэтых мэтах усе авіярэйсы будуць пераведзены ў міжнародныя сектары аэрапортаў Расіі. Адносна грамадзян Беларусі і Расіі пагранічны кантроль ажыццяўляцца не будзе. Яны могуць перамяшчацца па дакументах, што засведчваюць асобу, і пасадачных талонах на той ці іншы рэйс у адным або другім напрамку.

У Беларусі пагранічны кантроль на паветраных суднах, што накіроўваюцца авіярэйсамі з Беларусі ў Расію і ў зваротным напрамку, ажыццяўляцца не будзе. "Беларусь цяпер не бачыць прычын для правядзення пагранічнага кантролю на ўнутраных рэйсах паміж Расіяй і Беларуссю", - сказаў Алег Ляшук.

5 мая, Мінск /Кар. БЕЛТА/. Начальнік упраўлення інфармацыі - прэс-сакратар МЗС Беларусі Дзмітрый Мірончык пракаменціраваў журналістам перавод з 15 мая 2017 года ўсіх авіярэйсаў паміж Расіяй і Беларуссю ў міжнародныя сектары расійскіх аэрапортаў, паведамляе БЕЛТА.

"Мы сапраўды атрымалі афіцыйнае паведамленне расійскага боку 21 красавіка 2017 года аб пераводзе ўсіх авіярэйсаў паміж Расіяй і Беларуссю ў міжнародныя сектары расійскіх аэрапортаў і аператыўна праінфармавалі зацікаўленых, уключаючы Дзяржаўны пагранічны камітэт, Дзяржаўны мытны камітэт, Міністэрства ўнутраных спраў і Міністэрства транспарту Рэспублікі Беларусь", - расказаў Дзмітрый Мірончык.

Як запэўнівае расійскі бок, новы парадак не прывядзе да ўшчамлення свабоды перамяшчэння беларускіх і расійскіх грамадзян. "Паглядзім, як будуць рэалізоўвацца гэтыя новыя падыходы", - дадаў ён.

Раней дзяржаўны сакратар Саюзнай дзяржавы Рыгор Рапота паведаміў журналістам, што ўсе рэйсы паміж Беларуссю і Расіяй з 15 мая перавядуць у міжнародныя сектары расійскіх аэрапортаў. Пасажырам, якія не з'яўляюцца грамадзянамі гэтых дзвюх краін, неабходна будзе праходзіць пагранічны кантроль. Аднак, звярнуў увагу ён, гэтыя новаўвядзенні не паўплываюць на пералёты грамадзян Беларусі і Расіі, якія карыстаюцца гэтымі рэйсамі. Пагранічны кантроль у дачыненні да іх ажыццяўляцца не будзе, і яны па-ранейшаму змогуць перасякаць граніцу па ўнутраных пашпартах. Пры гэтым беларусы і расіяне павінны будуць захоўваць пасадачны талон для прад'яўлення пасля прыбыцця ў Расію.