Падзеі

9 верасня, Мінск /Кар. БЕЛТА/. МЗС Беларусі заклікала КНДР не дапускаць дзеянняў, што прыводзяць да ўзмацнення напружанасці ў рэгіёне. Аб гэтым гаворыцца ў заяве прэс-службы Міністэрства замежных спраў Беларусі ў сувязі з чарговым ядзерным выпрабаваннем, праведзеным Карэйскай Народна-Дэмакратычнай Рэспублікай 9 верасня, паведамляе БЕЛТА.

"Устойлівы мір і стабільнасць дасяжныя толькі на аснове дыялогу і ўзаемнай павагі. Заклікаем КНДР не дапускаць дзеянняў, што прыводзяць да ўзмацнення напружанасці ў рэгіёне, вярнуцца за стол перагавораў і далучыцца да асноватворных міжнародных інструментаў у галіне ядзернага нераспаўсюджвання", - заявілі ў ведамстве.

У МЗС адзначылі, што ў Беларусі з глыбокай заклапочанасцю ўспрыняты апошнія паведамленні з Карэйскага паўвострава. Чарговае ядзернае выпрабаванне, праведзенае Карэйскай Народна-Дэмакратычнай Рэспублікай, парушае як нормы міжнароднага права, так і палажэнні шэрага рэзалюцый Савета Бяспекі ААН. "Такія дзеянні ўяўляюць сабой пагрозу для бяспекі і стабільнасці не толькі ў рэгіёне Паўночна-Усходняй Азіі, але і свету ў цэлым", - падкрэслілі ў прэс-службе.