Падзеі

МЗС Беларусі расказала аб святкаванні Дня Перамогі беларускімі загранустановамі

Фота Пасольства Рэспублікі Беларусь у Азербайджанскай Рэспубліцы

9 мая, Мінск /Кар. БЕЛТА/. Дзень Перамогі традыцыйна шырока адзначаецца беларускімі дыпламатамі. Даніну памяці і павагі подзвігу пераможцаў нязменна аддаюць супрацоўнікі Міністэрства замежных спраў і загранустаноў нашай краіны, расказалі карэспандэнту БЕЛТА ў МЗС.

Беларускія дыпламаты ў Аўстрыі ўшанавалі памяць вязняў нацысцкіх канцэнтрацыйных лагераў Маўтгаўзен, Эбензее і Гузен, усклалі кветкі да помніка ахвярам "Мюльфіртэльскага палявання". Яны таксама наведалі месца пахавання ўраджэнца Магілёўшчыны Героя Савецкага Саюза Льва Маневіча ў г.Лінц.

Пасол Беларусі ў Азербайджане Андрэй Раўкоў разам з кіраўнікамі дыпламатычных місій усклаў вянок на мемарыяле воінскай славы ў Баку.

Пасол Беларусі ў Арменіі Аляксандр Канюк сумесна са старшынёй Ерэванскай беларускай абшчыны Арменіі "Беларусь" Ірынай Пагасян усклаў кветкі да помніка "Яны змагаліся за Радзіму".

Часовы павераны ў справах Беларусі ў Бельгіі Кацярына Шатохіна сумесна з дыпламатамі шэрага краін СНД усклала вянкі да мемарыяла савецкім грамадзянам, якія загінулі пры вызваленні Бельгіі, а таксама да помніка "Сцяна расстраляных" у гонар бельгійцаў, якія загінулі ў час Другой сусветнай вайны.

У Балгарыі часовы павераны ў справах Беларусі Мікіта Лешукоў сумесна з расійскімі калегамі і прадстаўнікамі балгарскай грамадскасці прыняў удзел у цырымоніі ўскладання вянкоў і кветак да помніка савецкаму салдату-вызваліцелю "Алёша" ў Плоўдзіве, а таксама да помніка Савецкай арміі і да брацкай магілы воінаў, якія загінулі ў гады Вялікай Айчыннай вайны.

Пасол Беларусі ў Венгрыі Уладзімір Улаховіч разам з калегамі з Азербайджана, Казахстана, Кітая, Кыргызстана, Расіі, Узбекістана і Сербіі ўсклаў вянкі на плошчы Свабоды ў Будапешце да помніка савецкім воінам-вызваліцелям. Беларускія дыпламаты ў Венгрыі таксама ўшанавалі памяць герояў Другой сусветнай вайны, усклаўшы кветкі да мемарыялаў у гарадах Кечкемет і Капашвар.

Кіраўнік беларускай дыпламатычнай місіі ў Германіі Дзяніс Сідарэнка ўсклаў кветкі да Савецкага мемарыяла Шонхальцэр Хайдэ і манументаў савецкім воінам у мемарыяльных комплексах Трэптаў-парк і Тыргартэн у Берліне.

У В'етнаме пасол Беларусі Уладзімір Баравікоў прыняў удзел у цырымоніі ўскладання вянкоў да Маўзалея Хо Шы Міна і Помніка загінулым героям.

Часовы павераны ў справах Беларусі ў Вялікабрытаніі Дзмітрый Шчапачоў усклаў вянкі да Савецкага ваеннага мемарыяла ў Лондане.

У Грузіі беларускі пасол Анатоль Ліс усклаў кветкі да помніка Мелітону Кантарыя ў парку культуры і адпачынку ветэранаў імя Кіквідзэ ў г.Тбілісі.

Пасол Беларусі ў Ізраілі Яўген Вараб'ёў прыняў удзел ва ўскладанні вянкоў да мемарыяльнай стэлы ў лесе Чырвонай Арміі ў мястэчку Абу-Гош пад Іерусалімам.

Урачыстасці прайшлі і ў Індыі, дзе пасол Беларусі Андрэй Ржавускі разам з кіраўнікамі загранустаноў краін СНД усклаў кветкі да мемарыяла загінулым у гады Вялікай Айчыннай вайны.

Часовы павераны ў справах Беларусі ў Іспаніі Сяргей Балашчанка прыняў удзел ва ўрачыстай цырымоніі ўскладання вянкоў да помнікаў Савецкім добраахвотнікам, якія ўдзельнічалі ў Грамадзянскай вайне ў Іспаніі, і іспанцам, якія загінулі ў барацьбе з фашызмам, на могілках Фуэнкараль (г.Мадрыд).

Калектыў пасольства Беларусі ў Італіі і прадстаўнікі беларускай дыяспары ўсклалі кветкі да магіл беларусаў, якія загінулі пры вызваленні Італіі.

Пасол Беларусі ў Казахстане Павел Уцюпін сумесна з кіраўнікамі дыпламатычных прадстаўніцтваў Азербайджана, Арменіі, Кыргызстана, Расіі, Таджыкістана, Туркменістана і Узбекістана ўсклаў вянок і кветкі да манумента абаронцам Айчыны ў Астане.

Кіраўнік беларускай дыпмісіі ў Кыргызстане Андрэй Страчко прыняў удзел у мітынгу-рэквіеме на плошчы Перамогі ў Бішкеку і ўсклаў кветкі да Вечнага агню.

Беларускія дыпламаты ў Літве сумесна з расійскімі калегамі і прадстаўнікамі літоўскіх ветэранскіх арганізацый усклалі вянкі на Антакальніскіх могілках, у месцы, дзе раней быў мемарыяльны комплекс, прысвечаны воінам-вызваліцелям.

Дыпламаты генконсульства Беларусі ў Даўгаўпілсе (Латвія) сумесна з кіраўніцтвам гарадской думы, актывам беларускай дыяспары і членамі Даўгаўпілскага таварыства барацьбітоў антыгітлераўскай кааліцыі ўсклалі вянкі і кветкі да Вечнага агню і месцаў пахавання савецкіх салдат і ахвяр вайны.

Часовы павераны ў справах Беларусі ў Малдове Андрэй Кароль сумесна з беларускай дыяспарай усклаў кветкі да Вечнага агню на мемарыяле воінскай славы "Вечнасць", а таксама ў алеі беларускіх бяроз, закладзенай у Кішынёве ў 2008 годзе ў памяць аб савецкіх воінах, якія загінулі ў Вялікай Айчыннай вайне.

Кіраўнік беларускай дыпламатычнай місіі ў Манголіі Дзмітрый Гарэлік усклаў вянкі да мемарыяла памяці савецкіх воінаў на гары Зайсан і да помніка маршалу Савецкага Саюза Г.К. Жукаву ва Улан-Батары.

Пасол Беларусі ў Нідэрландах Андрэй Еўдачэнка ўсклаў вянкі да помніка савецкім воінам, мемарыяла саюзнікам і мемарыяла невядомаму салдату ў горадзе Лёсдэн.

Часовы павераны ў справах Беларусі ў Польшчы Аляксандр Часноўскі ўсклаў вянок да помніка на мемарыяльных могілках савецкіх воінаў у Варшаве. У гэты ж дзень на Брудноўскіх могілках прадстаўнікі беларускага пасольства ўсклалі вянок да помніка воінам, якія загінулі ў баях за вызваленне Варшавы.

Часовы павераны ў справах Беларусі ў Румыніі Сяргей Жартун разам з калегамі з Расіі, Азербайджана, Казахстана і Туркменістана, прадстаўнікамі румынскіх грамадскіх аб'яднанняў і ветэранскіх арганізацый прыняў удзел у цырымоніі ўрачыстага ўскладання вянкоў на савецкім воінскім мемарыяльным пахаванні ў парку "Херэстрэу".

Пасол Беларусі ў Расіі Дзмітрый Крутой і дыпламаты пасольства, прадстаўнікі Пастаяннага камітэта Саюзнай дзяржавы, Еўразійскай эканамічнай камісіі, Парламенцкага сходу Саюза Беларусі і Расіі ўсклалі вянкі і кветкі да Магілы Невядомага Салдата і памятных знакаў "Горад-герой Мінск" і "Брэсцкая крэпасць-герой" у Аляксандраўскім садзе ля Крамлёўскай сцяны.

У мемарыяльным комплексе "Вызваліцелям Бялграда" пасол Беларусі ў Сербіі Валерый Брылёў усклаў вянок да помніка савецкім і югаслаўскім воінам, якія загінулі пры вызваленні Бялграда ад нямецка-фашысцкіх захопнікаў, помніка савецкаму салдату, а таксама да манумента "Вечны агонь" і магіл савецкіх воінаў - выхадцаў з Беларусі.

Кіраўнік беларускай дыпмісіі ў Сірыі Юрый Слука прыняў удзел ва ўрачыстых мерапрыемствах, прысвечаных святкаванню 78-й гадавіны Перамогі ў Вялікай Айчыннай вайне.

Часовы павераны ў справах Беларусі ў Славакіі Ігар Лятун усклаў вянок на ваенна-мемарыяльным комплексе "Славін" у Браціславе з нагоды 78-й гадавіны Перамогі ў Вялікай Айчыннай вайне. Ва ўрачыстай цырымоніі таксама прынялі ўдзел кіраўнікі дыпламатычных місій Расіі, Казахстана, Кітая, прадстаўнікі епархіі праваслаўнай царквы Славакіі, а таксама актывісты Славацкага саюза барацьбітоў-антыфашыстаў і славацкіх грамадскіх арганізацый.

У Туркменістане пасол Беларусі Вячаслаў Бяскосты разам з кіраўнікамі іншых загранустаноў ушанаваў памяць загінулых ля помніка "Вечная слава" мемарыяльнага комплексу "Народная памяць" (Ашхабад). Раней дыпламаты павіншавалі з Днём Перамогі ўдзельніцу партызанскага руху Гомельшчыны Людмілу Віктараўну Летуноўскую, якая пражывае ў Туркменістане.

Пасол Беларусі ва Узбекістане Леанід Марыніч прыняў удзел ва ўрачыстай цырымоніі адкрыцця фотавыставы архіўных дакументаў "Памяць - вечная, чалавечая каштоўнасць - свяшчэнная" ў Дзяржаўным музеі гісторыі Узбекістана. Беларускія дыпламаты таксама прынялі ўдзел ва ўрачыстай цырымоніі на мемарыяльным комплексе "Брацкія магілы" ў Ташкенце.

Пасол Беларусі ў Фінляндыі Аляксей Самасуеў усклаў вянок да ваеннага мемарыяла - брацкай магілы на паўвостраве Ханка. Сёння ж трэці сакратар пасольства Беларусі ў Фінляндыі разам з супрацоўнікамі гандлёвага прадстаўніцтва Расіі прыняў удзел ва ўрачыстай цырымоніі ля мемарыяльнага помніка загінулым савецкім ваеннапалонным у раёне Малмі ў Хельсінкі.

версія для друку

зрабіць стартавай

дабавіць у выбранае