Падзеі
МЗС Беларусі агучыла меры для актывізацыі барацьбы міжнароднай супольнасці з гандлем людзьмі
1 жніўня, Мінск /Уладзімір Мацвееў - БЕЛТА/. У Міністэрстве замежных спраў Беларусі агучылі меры для актывізацыі барацьбы міжнароднай супольнасці з гандлем людзьмі. Адпаведныя заявы сёння на брыфінгу, прымеркаваным да Сусветнага дня барацьбы з гандлем людзьмі, зрабіў намеснік міністра замежных спраў Беларусі Валянцін Рыбакоў, перадае карэспандэнт БЕЛТА.
"Адзначаючы Сусветны дзень барацьбы з гандлем людзьмі, у гэтым годзе Беларусь заклікае ўсіх партнёраў дзейнічаць разам. Мы павінны забяспечыць усеагульнае выкананне ўсіх міжнародна-прававых дакументаў, якія нацэлены на барацьбу з гандлем людзьмі, у першую чаргу, пратакола аб папярэджанні і спыненні гандлю людзьмі, які дапаўняе міжнародную канвенцыю супраць транснацыянальнай арганізаванай злачыннасці", - заявіў намеснік міністра.
Ён таксама адзначыў неабходнасць дабівацца прадухілення шляхам крыміналізацыі попыту злачынстваў, звязаных з трафікінгам, садзейнічаць павышэнню інфармаванасці ў грамадстве аб праблеме гандлю людзьмі.
"Мы павінны забяспечыць поўную і эфектыўную міжнародную каардынацыю намаганняў па барацьбе з гандлем людзьмі, умацоўваць міжнароднае супрацоўніцтва на аператыўным узроўні. Павінны, прынамсі, спрабаваць байкатаваць тыя тавары, у вытворчасці якіх задзейнічана праца ахвяр гандлю людзьмі і прымаць любыя неабходныя меры для таго, каб абараняць ахвяр гандлю людзьмі і аказваць ім усю належную дапамогу", - сказаў Валянцін Рыбакоў.
Намеснік міністра адзначыў, што ў цяперашнім мерапрыемстве акрамя традыцыйных партнёраў прымаюць удзел і прадстаўнікі бізнесу. "Урад і прыватны сектар могуць вельмі эфектыўна процістаяць трафікінгу, калі размова ідзе аб гандлі людзьмі ў ланцужках паставак. Няўрадавыя арганізацыі аказваюць неацэнную дапамогу ў рэабілітацыі ахвяр гандлю людзьмі. Мы ўпэўнены, што разам мы можам вельмі многае змяніць", - падкрэсліў ён.
У сваю чаргу кіраўнік прадстаўніцтва Міжнароднай арганізацыі па міграцыі ў Беларусі Зейнал Гаджыеў адзначыў тры важныя пытанні, вырашэнне якіх павінна быць у цэнтры ўвагі ўсіх зацікаўленых бакоў, у тым ліку няўрадавых арганізацый, грамадзянскай супольнасці, прыватнага сектара і міжнароднай супольнасці.
Першае пытанне - ідэнтыфікацыя ахвяр гандлю людзьмі, што застаецца на парадку дня, нягледзячы на ўсе прыкладаемыя намаганні. Колькасць ахвяр гандлю людзьмі ў свеце вылічаецца мільёнамі, аднак рэальна дапамога аказваецца вельмі нязначнай колькасці людзей, часам менш як 1 працэнту з ліку пацярпелых.
Па-другое, Зейнал Гаджыеў адзначыў неабходнасць паляпшэння эфектыўнасці прымаемых прэвентыўных мер, у тым ліку накіраваных на выкараненне попыту на паслугі і тавары, што прапануюцца шматмільярдным злачынным бізнесам.
Па-трэцяе, важны комплексны падыход да процідзеяння гандлю людзьмі, што патрабуе ўсвядомленых і скаардынаваных намаганняў на розных узроўнях.
Зейнал Гаджыеў расказаў аб намаганнях МАМ па процідзеянні гандлю людзьмі і адзначыў значныя намаганні беларускіх улад у гэтай сферы як на нацыянальным, так і на міжнародным узроўні.
версія для друку
зрабіць стартавай
дабавіць у выбранае