Падзеі

3 ліпеня, Мінск /Кар. БЕЛТА/. Мінская дэкларацыя будзе прынята па выніках дыскусій на 26-й летняй сесіі Парламенцкай асамблеі АБСЕ, паведаміў у інтэрв'ю БЕЛТА старшыня Палаты прадстаўнікоў Нацыянальнага сходу Беларусі Уладзімір Андрэйчанка.

Як растлумачыў спікер, парадак дня маючай адбыцца летняй сесіі ПА АБСЕ складваецца з дакладаў трох агульных камітэтаў: па палітычных пытаннях і бяспецы; па эканамічных пытаннях, навуцы, тэхналогіі і навакольным асяроддзі; па дэмакратыі, правах чалавека і гуманітарных пытаннях. "Рэзалюцыі, прынятыя па выніках дыскусій, будуць пакладзены ў аснову Мінскай дэкларацыі, у якой будуць сфармуляваны рэкамендацыі для нацыянальных урадаў, парламентаў і міжнароднай супольнасці па рэагаванні на актуальныя выклікі і пагрозы, што паўстаюць перад імі", - расказаў Уладзімір Андрэйчанка.

Паводле яго слоў, у дэкларацыю ўвойдуць таксама некалькі дадатковых рэзалюцый, якія ініцыіруюць асобныя парламентарыі самастойна. Гэтыя рэзалюцыі закранаюць даволі шырокае кола пытанняў. "Тут і процідзеянне тэрарызму, і міграцыйныя выклікі, і недапушчальнасць распальвання міжрэлігійнай варожасці, і ўмацаванне энергетычнай бяспекі, і шмат іншага", - адзначыў старшыня Палаты прадстаўнікоў.

Летняя сесія ПА АБСЕ пройдзе ў Мінску 5-9 ліпеня і будзе прысвечана ўмацаванню ўзаемнага даверу і супрацоўніцтва ў імя міру і працвітання ў рэгіёне. Беларускі бок прапануе да разгляду рэзалюцыю "Распрацоўка своечасовых і эфектыўных заканадаўчых, нарматыўных, адміністрацыйных мер рэагавання на з'яўленне новых псіхаактыўных рэчываў".