Падзеі

МНС выдала дазвол на загрузку паліва на першым энергаблоку БелАЭС

Фота з архiва

6 жніўня, Мінск /Кар. БЕЛТА/. Выдадзены дазвол на права загрузкі штатнай актыўнай зоны рэактара нумар 1 Беларускай АЭС, паведамілі БЕЛТА ў Дэпартаменце па ядзернай і радыяцыйнай бяспецы МНС (Дзяржатамнагляд).

"Калегіяй Міністэрства па надзвычайных сітуацыях 6 жніўня прынята станоўчае рашэнне аб унясенні дапаўнення ў ліцэнзію ДП "Беларуская АЭС" на права дзейнасці ў галіне выкарыстання атамнай энергіі. Гэта дазваляе выканаць першую загрузку штатнай актыўнай зоны рэактара энергаблока нумар 1 Беларускай АЭС", - праінфармавалі ў Дзяржатамнаглядзе.

Гэта рашэнне грунтуецца на заключэнні Дзяржатамнагляду, які ў адпаведнасці з заканадаўствам разгледзеў вынікі экспертызы дакументаў, што абгрунтоўваюць бяспеку, і правёў мэтавую праверку гатоўнасці Беларускай АЭС выканаць заяўленую дзейнасць.

Дзяржатамнагляд кантралюе выкананне ліцэнзійных патрабаванняў і ўмоў, уключаючы спецыяльныя ўмовы дзеяння ліцэнзіі, з дапамогай нагляду і мэтавых праверак. Вынікі нагляду разам з іншымі дакументамі аналізуюцца перад прыняццем рашэнняў аб выдачы БелАЭС дазволаў.

Як паведамлялася раней, рэгулюючы орган будзе паслядоўна і з улікам гатоўнасці БелАЭС выдаваць дазволы для этапаў уводу ў эксплуатацыю першага энергаблока: першая загрузка штатнай актыўнай зоны, выпрабаванні ў падкрытычным стане рэактарнай устаноўкі, выкананне фізічных эксперыментаў на мінімальна кантралюемым узроўні, энергетычны пуск і доследна-прамысловая эксплуатацыя.

Пасля завяршэння гэтых этапаў разгледзяць пытанне аб выдачы ліцэнзіі на эксплуатацыю першага энергаблока, якая выдаецца да пачатку работы дзяржаўнай камісіі па прыёмцы аб'екта ў эксплуатацыю. У адпаведнасці з бягучымі графікамі работ і агучанай раней інфармацыяй, выхад на этап эксплуатацыі першага энергаблока Беларускай АЭС чакаецца ў I квартале 2021 года.

Дзяржатамнагляд акцэнтуе ўвагу, што перад выдачай ліцэнзіі на эксплуатацыю першага энергаблока БелАЭС будуць праведзены грамадскія слуханні. Іх мэта - давядзенне да грамадскасці інфармацыі аб ходзе і выніках экспертызы бяспекі і ацэнкі адпаведнасці БелАЭС ліцэнзійным патрабаванням і ўмовам.

Беларуская АЭС з двума рэактарамі ВВЭР-1200 сумарнай магутнасцю 2400 МВт будуецца па расійскім праекце паблізу Астраўца (Гродзенская вобласць). Генеральным падрадчыкам выступае інжынірынгавы дывізіён дзяржкарпарацыі "Расатам".

версія для друку

зрабіць стартавай

дабавіць у выбранае