Падзеі
Макей зрабіў прагноз аб развіцці адносін Беларусі з ЕС пасля выбараў
26 чэрвеня, Мінск /Кар. БЕЛТА/. Міністр замежных спраў Уладзімір Макей у гутарцы з журналістамі пракаменціраваў апошнія падзеі ў краіне і зрабіў прагноз, як могуць развівацца адносіны Беларусі з Еўрапейскім саюзам і іншымі краінамі пасля прэзідэнцкіх выбараў, перадае карэспандэнт БЕЛТА.
На думку кіраўніка МЗС, праз "дзеянні на вуліцах" немагчыма змяніць сітуацыю ў краіне. "Я перакананы (і наўрад ці вы зможаце аспрэчыць), што за апошнія 4-5 гадоў пасля таго, як пачалі аднаўляцца адносіны з ЕС, іншымі заходнімі краінамі, мы дасягнулі большага, чым за папярэднія 16 гадоў санкцый. І цяпер, калі мы рэальна пачалі працаваць над дыверсіфікацыяй знешнепалітычнай і знешнеэканамічнай дзейнасці, развіццё падзей па непажаданым сцэнарыі паставіла б кропку на гэтай сферы. Гэта нікому не патрэбна, нявыгадна", - сказаў Уладзімір Макей.
Паводле яго слоў, МЗС вядзе вельмі цесны дыялог з Еўрапейскім саюзам. "Вядома, яны выказваюць свае апасенні (наконт апошніх падзей, звязаных з правядзеннем выбарчай кампаніі. - Заўвага БЕЛТА), мы - свой афіцыйны погляд на развіццё падзей. Я іх прашу толькі аб адным: каб аналізуючы сітуацыю ў Беларусі, яны рабілі высновы на аснове аб'ектыўнага аналізу і пасля гэтага ўносілі прапановы ў свае сталіцы", - падкрэсліў ён.
Уладзімір Макей адзначыў, што некаторыя спрабуюць праводзіць паралелі паміж тым, што адбываецца цяпер, і падзеямі 2010 года. "Запэўніваю вас, што рэжым моцны, спакойны, і мы ўпэўнены, што сітуацыя будзе пад кантролем. Я разумею, што пасля гэтага будзе шквал крытыкі асабіста ў мой адрас і я буду чарговы раз уключаны ў спіс "ворагаў прагрэсіўнага чалавецтва", але, тым не менш, - сказаў міністр. - Калі адбудуцца непажаданыя падзеі, якія адкінуць нас у 2010 год, то трэцяй адлігі не будзе. Аднаўленне нармальных адносін з іншымі краінамі зойме значна больш часу, чым пасля 2010 года".
Кіраўнік МЗС падкрэсліў, што Беларусь зацікаўлена ў захаванні канструктыўных адносін з іншымі краінамі. "Упэўнены, што ў гэтым павінна быць зацікаўлена і грамадства. Гэта дазволіць нам і пасля выбараў намнога хутчэй рухацца ў розных сферах і галінах, ва ўдасканаленні заканадаўства, палітычнай сістэмы", - сказаў ён.
Уладзімір Макей таксама пракаменціраваў бягучыя падзеі ўнутрыпалітычнай сітуацыі ў краіне, у прыватнасці, затрымання праваахоўнымі органамі аўтараў Telegram-каналаў. Ён звярнуў увагу, што гэтымі пытаннямі павінны займацца кампетэнтныя органы. Паводле яго слоў, ёсць звесткі, якія дазваляюць сцвярджаць, што многія падзеі не маглі ўзнікнуць спантанна, яны былі арганізаваны. Значную ролю ў падаграванні абстаноўкі адыгралі фэйкі, якіх стала значна больш апошнім часам. "Вялікая колькасць фэйкаў, аб чым учора гаварыў і Прэзідэнт, служыць падставай потым для выхаду людзей на вуліцы, - сказаў, звяртаючыся да журналістаў, міністр. - Некаторыя вашы калегі з незалежных СМІ, Telegram-каналаў неафіцыйна, сарамліва нам гавораць, што ім прапаноўваюць пэўныя сумы за тое, каб яны размясцілі інфармацыю адпаведнага зместу аб адпаведных персонах. Не буду называць прозвішчы, але яны ў нас ёсць".
Кіраўнік МЗС прызнаўся, што часам з цікавасцю чытае ў Telegram-каналах такія "сакрэтныя навіны" пра самога сябе. На адзін з апошніх фэйкаў давялося афіцыйна рэагаваць з боку МЗС. Гаворка аб інфармацыі пра нібыта існуючы ўклад на імя аднаго з сыноў Прэзідэнта ў швейцарскім банку. "Банк ужо абверг, але мы ўсё роўна афіцыйна запыталі швейцарскі бок, каб яны нам далі гэту інфармацыю", - расказаў ён.
"Тыя, хто ўкідваюць такую навіну, зыходзяць, напэўна, з таго, што адбываецца ў іх краінах. Не сакрэт, што ў многіх дзяржавах сам працэс знаходжання ва ўладзе звязаны з абагачэннем. Хачу сказаць, што ў Беларусі такога не было, няма і не будзе, пакуль цяперашняе кіраўніцтва знаходзіцца на чале ўлады", - дадаў кіраўнік МЗС.
Акрамя таго, міністр парэкамендаваў больш акуратна выкарыстоўваць такія паняцці, як "палітычныя зняволеныя", і прымаць пад увагу інфармацыю праваахоўных органаў аб проціпраўных дзеяннях некаторых асоб. "Калі былі ўчынены нейкія дзеянні (з боку праваахоўнікаў. - Заўвага БЕЛТА), напэўна на гэта былі важкія падставы, - сказаў ён. - Напэўна былі ўзважаны ўсе за і супраць і было прынята адпаведнае рашэнне".
версія для друку
зрабіць стартавай
дабавіць у выбранае