Падзеі

Макей прыме ўдзел у 77-й сесіі Генеральнай Асамблеі ААН у Нью-Ёрку

Фота з архiва

19 верасня, Мінск /Кар. БЕЛТА/. Беларуская дэлегацыя на чале з міністрам замежных спраў Уладзімірам Макеем 21-26 верасня прыме ўдзел у 77-й сесіі Генеральнай Асамблеі ААН у Нью-Ёрку. Аб гэтым БЕЛТА паведамілі ў прэс-службе МЗС Беларусі.

"Работа 77-й сесіі стане своеасаблівай "праверкай на трываласць" для ўсёй сістэмы ААН і індыкатарам рэальнай здольнасці арганізацыі дзейнічаць ва ўмовах крызісу шматбаковасці і крайняга абвастрэння супярэчнасцей паміж дзяржавамі-членамі, - адзначылі ў МЗС. - Задачы дэлегацыі Рэспублікі Беларусь будуць накіраваны на абарону нацыянальных інтарэсаў ва ўмовах бягучага комплекснага крызісу ў галіне міжнароднай бяспекі, процідзеянне падрыву міжнароднай шматбаковай сістэмы і легалізацыі санкцыйнай палітыкі Захаду ў ААН як метаду вядзення двухбаковых адносін з дзяржавамі - членамі арганізацыі".

Праграмай візіту Уладзіміра Макея ў Нью-Ёрк прадугледжаны выступленні кіраўніка беларускага знешнепалітычнага ведамства на агульнапалітычнай дыскусіі 77-й сесіі Генеральнай Асамблеі ААН, удзел у сустрэчах міністраў замежных спраў дзяржаў - членаў АДКБ і дзяржаў - удзельніц Руху недалучэння, міністэрскай сустрэчы Групы сяброў у абарону Статута ААН, міністэрскай сустрэчы Групы аднадумцаў у падтрымку краін з сярэднім узроўнем даходу, падпісанні Канвенцыі аб аблягчэнні ўмоў перасячэння граніц пры міжнароднай чыгуначнай перавозцы пасажыраў, багажу, таварабагажу.

На палях Генасамблеі запланаваны шэраг двухбаковых сустрэч Уладзіміра Макея з калегамі з Еўропы, Лацінскай Амерыкі, Паўднёва-Усходняй Азіі, кіраўніцтвам Арганізацыі Аб'яднаных Нацый.

Напярэдадні ўдзелу беларускай дэлегацыі ў пасяджэнні Генасамблеі МЗС запускае ў сацыяльных сетках ініцыятыву "За Макеем у ААН". Школьнікі, студэнты, маладыя вучоныя і проста энтузіясты ў сферы міжнародных адносін і знешняй палітыкі Беларусі змогуць 20 верасня прыслаць сваё пытанне аб дзейнасці Беларусі ў ААН кіраўніку беларускай дэлегацыі на пасяджэнні Генасамблеі ААН Уладзіміру Макею і атрымаць адказ з самога сэрца ААН у Нью-Ёрку.

Адпаведнае заяўленай тэматыцы пытанне будзе выбрана выпадкова. Прыслаць свае пытанні можна асабістым паведамленнем праз акаўнты МЗС у сацыяльных сетках Facebook, "УКантакце" і TikTok. Падрабязнасці - у сацсетках міністэрства.

версія для друку

зрабіць стартавай

дабавіць у выбранае