Падзеі

МАГАТЭ апублікавала справаздачу аб выніках місіі PreOSART на Беларускай АЭС

Фота з архiва

19 мая, Мінск /Кар. БЕЛТА/. Міжнароднае агенцтва па атамнай энергіі (МАГАТЭ) апублікавала справаздачу з вынікамі місіі па разглядзе пытанняў перадэксплуатацыйнай бяспекі PreOSART, якая праходзіла на Беларускай АЭС з 5 па 22 жніўня 2019 года, паведамілі БЕЛТА ў прэс-службе Міністэрства энергетыкі Беларусі.

У ходзе місіі былі правераны 11 сфер - лідарства і кіраванне ў мэтах забеспячэння бяспекі, навучанне і атэстацыя, эксплуатацыя, тэхнічнае абслугоўванне і рамонт, тэхнічная падтрымка, улік вопыту эксплуатацыі, радыяцыйная ахова, хімія, аварыйная гатоўнасць і рэагаванне, кіраванне аварыямі і ўвод у эксплуатацыю.

Каманда місіі складалася з экспертаў з такіх краін, як Арменія, Бельгія, Бразілія, Францыя, Нідэрланды, Расійская Федэрацыя, Славакія і ЗША, а таксама ўключала членаў МАГАТЭ і наглядальнікаў з Рэспублікі Карэя і Аб'яднаных Арабскіх Эміратаў. Сукупны вопыт каманды ў атамнай энергетыцы склаў прыблізна 350 гадоў.

Па выніках сваёй работы каманда МАГАТЭ сфармулявала 11 рэкамендацый і 8 прапаноў для ўдасканалення эксплуатацыйнай бяспекі. Былі вызначаны 4 добрыя практыкі.

Адзначана надзейная сістэма апавяшчэння, якая не толькі падае сігнал трывогі, але і можа выкарыстоўвацца станцыяй для прадастаўлення інфармацыі і інструкцый насельніцтву ў выпадку радыелагічных і іншых аварыйных сітуацый, а таксама наяўнасць у спецыяльнай пажарнай часці БелАЭС ахоўнага збудавання на 60 чалавек такога ж узроўню абароненасці, як і ўкрыцці для персаналу станцыі. На блокавым пульце кіравання ёсць інтэгральная панэль, спецыяльна спраектаваная для кантролю і кіравання абсталяваннем, якое размешчана на пляцоўцы станцыі і неабходна ў аварыйных сітуацыях.

Сярод найбольш значных рэкамендацый - кіраўніцтву станцыі неабходна палепшыць нагляд і кантроль за праграмамі ўводу ў эксплуатацыю, эксплуатуючай арганізацыі трэба палепшыць праграму прадухілення пападання чужых прадметаў у важныя для бяспекі сістэмы і элементы станцыі. Рэкамендуецца ўкараніць праграму ўліку вопыту эксплуатацыі.

Кіраўніцтва Беларускай АЭС паведаміла, што мае намер разгледзець сферы, вызначаныя для паляпшэння, і заявіла аб гатоўнасці прыняць паўторную місію.

версія для друку

зрабіць стартавай

дабавіць у выбранае