Падзеі

Лукашэнка ўзнагародзіў супрацоўнікаў МНС за выратаванне людзей у свабодны ад службы час

Фота з архiва

17 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка 17 чэрвеня падпісаў указ, у адпаведнасці з якім 48 прадстаўнікоў розных сфер дзейнасці ўдастоены дзяржаўных узнагарод. У іх ліку аказаліся і супрацоўнікі МНС, якія ў свабодны ад нясення службы час выратавалі людзей у надзвычайных сітуацыях, паведамляе БЕЛТА.

Медалём "За выратаванае жыццё" ўзнагароджаны вадзіцель пажарнай аварыйна-выратавальнай часці нумар 1 Хойніцкага раённага аддзела па надзвычайных сітуацыях Мікалай Жураўскі, старшы інструктар-ратавальнік пажарнага аварыйна-выратавальнага паста нумар 15 Віцебскага раённага аддзела па надзвычайных сітуацыях Сяргей Іваноў і старшы інструктар-ратавальнік аддзялення дэзактывацыі, дэгазацыі і пажаратушэння пажарнай аварыйна-выратавальнай часці нумар 1 Пінскага гаррайаддзела па надзвычайных сітуацыях Андрэй Салівон.

Як паведамлялася, вечарам 18 студзеня хойніцкім ратавальнікам паступіў сігнал аб пажары ў жылым доме на вуліцы Новай у аграгарадку Веляцін. Яшчэ да прыбыцця падраздзяленняў МНС чалавечае жыццё было выратавана. У свабодны ад нясення службы час Мікалай Жураўскі зайшоў у задымлены дом, дзе ў пакоі, які гарэў, на ложку знайшоў і вынес на вуліцу 60-гадовага гаспадара дома.

Пасля агляду медыкамі выратаванага мужчыну адпусцілі дадому. Ён не пацярпеў. Агонь не паспеў нанесці сур'ёзнага ўрону маёмасці.

У лютым у гарадскім пасёлку Янавічы Віцебскага раёна прапаршчык МНС Сяргей Іваноў выратаваў на пажары свайго суседа. Вечарам яму на мабільны тэлефон пазванілі знаёмыя і сказалі, што ў яго пад'ездзе з акна кватэры на трэцім паверсе відаць агонь.

"Я не задумваючыся выбег на пляцоўку і пацягнуў за ручку дзвярэй, яны аказаліся зачыненымі. Уваходныя дзверы драўляныя, таму я з лёгкасцю выбіў іх. У калідоры кватэры было шмат дыму, у адным з пакояў ужо гарэлі ложкі, вугал пакоя і маёмасць гаспадара. Я закрыў дзверы ў пакой, які гарэў, і пайшоў у суседні, дзе на канапе ўбачыў свайго суседа, ён спаў і ніяк не рэагаваў. Я падхапіў яго на рукі і пачаў выцягваць з кватэры, ужо на ўваходзе ён апрытомнеў", - расказваў ратаўнік.

Да гэтага часу на месца прыехалі падраздзяленні МНС, якія пачалі тушэнне пажару. Для гаспадара кватэры, якая гарэла, усё скончылася добра.

Андрэй Салівон быў прадстаўлены да ўзнагароды пасля выратавання пажылога рыбака, які праваліўся пад лёд. Мужчына адышоў ад берага на адлегласць каля 70 м і ў нейкі момант праваліўся пад лёд. Пасля таго як сігнал паступіў у службу па надзвычайных сітуацыях, ратавальнікі выехалі на месца і адначасова паведамілі аб здарэнні свайму калегу Андрэй Салівону, які жыў побач. Ён неадкладна накіраваўся да месца здарэння і разам з ратавальнікам-пажарным ведамаснай прафесійна-пажарнай ратавальнай аховы кампаніі "Пінскдрэў" Сяргеем Лосічам да прыбыцця падраздзяленняў МНС дастаў рыбака з палонкі.

версія для друку

зрабіць стартавай

дабавіць у выбранае