Падзеі
Лукашэнка: у бліжэйшы час з'явяцца прапановы па рэформе Канстытуцыі з улікам сённяшняга часу
Фота з архiва
9 верасня, Мінск /Кар. БЕЛТА/. У бліжэйшы час з'явяцца прапановы па рэформе Канстытуцыі з улікам сённяшняга часу. Аб гэтым Прэзідэнт Беларусі Аляксандр Лукашэнка заявіў у інтэрв'ю расійскім СМІ, паведамляе БЕЛТА.
Аляксандр Лукашэнка расказаў, што яму ўжо былі прадстаўлены два варыянты новай Канстытуцыі, але, з яго пункту гледжання, там былі недастаткова глыбокія змяненні. Цяпер група спецыялістаў працуе над трэцім варыянтам Канстытуцыі. "Яна ў бліжэйшы час выдасць прапановы з улікам сённяшняга часу", - сказаў Прэзідэнт.
Адказваючы на пытанне, з кім кіраўнік дзяржавы гатовы весці дыялог па рэформе грамадска-палітычнага жыцця ў краіне, Аляксандр Лукашэнка заявіў, што такое абмеркаванне павінна пачынацца знізу. "Я павінен у Брэсце, Гродне, Віцебску, Магілёве, Мінску весці дыялог са студэнтамі (гэта актуальна цяпер), з працоўнымі калектывамі, актывам. Актыў - гэта не толькі тыя, хто ва ўладзе, але і частка грамадзянскай супольнасці. У нас ёсць ветэранскія, прафсаюзныя арганізацыі (прытым розныя), ёсць жаночыя арганізацыі і нават партыі. У нас ёсць маладзёжныя арганізацыі. Грамадства добра структуравана. І іх прадстаўнікі, у тым ліку тыя, якія маюць іншы пункт гледжання, павінны размаўляць і з Прэзідэнтам. І мы павінны ў кожнай вобласці, сфарміраваўшы саветы, у тым ліку і з прадстаўнікоў нашай грамадзянскай супольнасці, органаў улады, абмяркоўваць гэту Канстытуцыю, уносіць прапановы", - лічыць беларускі лідар.
Прэзідэнт заявіў, што з той апазіцыяй, якая прапануе антырасійскія, а, значыць, і антыбеларускія праграмы або заклікае не плаціць падаткі, камуналку і не купляць беларускія тавары, яму гаварыць няма аб чым. Ён прывёў у прыклад іх прапанову аддаць інвестарам нядрэнныя дзяржаўныя прадпрыемствы. "Мы ўжо набліжаліся да прыватызацыі. Што кажуць інвестары? Палавіну людзей выкідваем, вось гэта вы не будзеце вырабляць, тое не будзеце. Груба кажучы, гайкі будзеце круціць і ўсё, а асноўныя кампетэнцыі будуць там, дапусцім, у Германіі ў Volvo па "БЕЛАЎТАМАЗе". Гэта значыць канструктарскія бюро, мазгі там будуць, а вы тут нейкай зборкай будзеце займацца, і палавіну людзей выкідваем. Скарачэнне вытворчасці, рабочай сілы, аддаць асноўныя мазгі ў Германію - хто на гэта пойдзе? Я на гэта не пайду. І што, я з імі буду размаўляць на тэму вось такіх інвестыцый?" - спытаў Аляксандр Лукашэнка.
"Або, дапусцім, платная адукацыя і ахова здароўя. Ды калі б у нас была платная ахова здароўя, мы трупамі ў кавід завалілі б усю краіну. Вы ведаеце, што такое платная ахова здароўя, паказала прагрэсіўная Еўропа і Амерыка: грошы ёсць - лечым. Вы хочаце, каб я сеў за стол і абмяркоўваў, уводзіць платную медыцыну ці не? Або адукацыю. Мы ж не багатыя людзі, але кожны можа атрымаць адукацыю. Прытым і бедны чалавек, і багаты. Мы за гэтым вельмі ўважліва назіраем", - падкрэсліў кіраўнік дзяржавы.
Ён таксама звярнуў увагу, што ў краіне ёсць яшчэ адзін важны орган - Усебеларускі народны сход. Яго чарговы з'езд павінен адбыцца ў снежні або студзені. На ім будзе планавацца развіццё краіны на бліжэйшую пяцігодку, абмяркоўвацца грамадска-палітычныя і эканамічныя пытанні. "Думаю, што на з'ездзе мы зможам нават прапісаць па тэрмінах некаторыя нашы дзеянні, да самых прэзідэнцкіх выбараў", - дадаў Прэзідэнт.
версія для друку
зрабіць стартавай
дабавіць у выбранае