Падзеі

Лукашэнка спадзяецца на ліквідацыю штучных бар'ераў паміж Беларуссю і Ірландыяй

17 сакавіка, Мінск /Кар. БЕЛТА/. Кіраўнік дзяржавы Аляксандр Лукашэнка ад імя жыхароў Беларусі і сябе асабіста павіншаваў народ Ірландыі з нацыянальным святам - Днём Святога Патрыка. Аб гэтым БЕЛТА паведамілі ў прэс-службе Прэзідэнта.

"Беларускае і ірландскае грамадства прайшлі няпросты шлях да незалежнасці і атрымання дзяржаўнасці. Нам добра вядома каштоўнасць суверэнітэту, права свабодна жыць на ўласнай зямлі і вызначаць сваю будучыню", - гаворыцца ў віншаванні.

Прэзідэнт адзначыў, што за 30 гадоў дыпламатычных адносін паміж краінамі, нягледзячы на геаграфічную аддаленасць, сфарміраваліся ўстойлівыя эканамічныя і сацыяльна-гуманітарныя сувязі. Аляксандр Лукашэнка звярнуў увагу, што беларусы добра памятаюць і цэняць дапамогу ірландскіх сяброў у пераадоленні наступстваў катастрофы на Чарнобыльскай АЭС.

"Перакананы, што эскалацыя напружання і палітыка канфрантацыі не адпавядаюць фундаментальным інтарэсам народаў. Спадзяюся, што мудрасць і гістарычны вопыт ірландцаў будуць садзейнічаць ліквідацыі штучных бар'ераў паміж дзяржавамі і вяртанню міждзяржаўнага дыялогу ў канструктыўнае рэчышча", - падкрэсліў беларускі лідар.

Кіраўнік дзяржавы пажадаў народу Ірландыі міру, адзінства і дабрабыту.

версія для друку

зрабіць стартавай

дабавіць у выбранае