Падзеі

Лукашэнка растлумачыў, навошта ў Беларусі патрэбна народнае апалчэнне

Фота з архiва

20 лютага, Мінск /Кар. БЕЛТА/. Кіраўнік дзяржавы Аляксандр Лукашэнка 20 лютага на пасяджэнні Савета бяспекі растлумачыў, навошта ў Беларусі спатрэбілася стварэнне народнага апалчэння, перадае карэспандэнт БЕЛТА.

Адным з дакументаў, вынесеных на разгляд, стаў праект закона "Аб народным апалчэнні". Каб не было інфармацыйных спекуляцый на гэту тэму, Аляксандр Лукашэнка адразу растлумачыў: "У нашай дзяржаве выбудавана эфектыўная сістэма абароны дзяржавы. Яе аснова - Узброеныя Сілы. Менавіта яны вырашаюць найбольш важныя задачы, якія патрабуюць канцэнтрацыі ўсіх намаганняў дзяржавы па яе абароне".

У той жа час, звярнуў увагу Прэзідэнт, барацьба са злачыннасцю, ахова грамадскага парадку і грамадская бяспека - сфера кампетэнцый органаў унутраных спраў і ўнутраных войскаў і ў мірны, і ў ваенны час. Для забеспячэння спакойнага функцыянавання дзяржаўных органаў і арганізацый, аб'ектаў эканомікі, інфраструктуры Беларусі ва ўмовах ваеннага часу створаны тэрытарыяльныя войскі. Іншыя сілавыя органы ў рамках кампетэнцыі вырашаюць таксама задачы па забеспячэнні абароны дзяржавы, адзначыў беларускі лідар.

"Але сітуацыя няпростая. Я ўжо не раз гаварыў: кожны мужчына (ды і не толькі мужчына) павінен умець, як мінімум, абыходзіцца са зброяй. Хаця б для таго, каб у выпадку неабходнасці абараніць сваю сям'ю, свой дом, родны куток зямлі і, калі спатрэбіцца, краіну, без якой не будзе ні кутка, ні дома, нічога іншага. Многія гэта разумеюць", - падкрэсліў Аляксандр Лукашэнка.

Прэзідэнт нагадаў, што раней ён паставіў задачу Міністэрству абароны сумесна з Міністэрствам унутраных спраў прапрацаваць пытанне стварэння народнага апалчэння. Праект адпаведнага закона быў падрыхтаваны і вынесены на разгляд пасяджэння Савета бяспекі. Акрамя таго, як дакладвалі раней Прэзідэнту, была праведзена апрабацыя на практыцы арганізацыі народнага апалчэння - быў створаны адзін з яго галоўных элементаў. Гэты вопыт таксама стане тэмай абмеркавання на пасяджэнні Савета бяспекі, уключаючы пытанні колькасці і дзеянняў народнага апалчэння па выкананні пастаўленых перад ім задач.

Як паведамлялася, кіраўнік дзяржавы раней неаднаразова заяўляў аб неабходнасці стварэння ў Беларусі войскаў тэрытарыяльнай абароны для рэагавання на магчымыя выклікі і пагрозы. "Таму што ніхто не будзе абараняць свой дом, як ты сам", - адзначаў ён у час размовы з журналістамі ў чэрвені 2022 года.

"Нам на ўсялякі выпадак трэба пры кожным сельскім савеце мець вось гэта народнае апалчэнне, групу людзей. Іх будзе няшмат. Можа, 50 чалавек. Але яны таксама павінны мець сваю зброю недзе на складзе. Мы іх прызываем для абучэння – яны возьмуць свае аўтаматы (у асноўным аўтамат, гранатамёт, пісталет), каб маглі абараніць свой дом", - растлумачыў Аляксандр Лукашэнка. У выпадку ваенных дзеянняў атрады народнага апалчэння могуць трансфармавацца ў партызанскі рух, лічыць кіраўнік дзяржавы. "Народнае апалчэнне можа быць рэзервам для тэрытарыяльнай абароны", - выказаў меркаванне ён.

Гаворачы аб мэтазгоднасці стварэння народнага апалчэння, Прэзідэнт падкрэсліў: "Гэта не проста так зроблена. Гэта ўсё ад зямлі. Няхай людзі вучацца валодаць зброяй, у гэтым няма нічога дрэннага. Якраз кожная сям'я зможа свой дом, пасёлак, вёску абараніць. Гэта зыходзіць з вопыту расійска-ўкраінскага канфлікту і ад зямлі".

Важнасць стварэння народнага апалчэння падкрэсліваў і міністр абароны Віктар Хрэнін: "Мы бачым, што гэта пытанне таксама вельмі важнае. Галоўнае, што ў нас ёсць для гэтага людзі і ўзбраенне. Сапраўды, колькасць абаронцаў нашай краіны можа павялічыцца ў разы. Гэта мае вялікае значэнне ў існуючай абстаноўцы. Адказ будзе адэкватным, калі хто-небудзь прыйдзе на нашу зямлю". На яго думку, тэрытарыяльная абарона можа аказаць вырашальнае дзеянне ва ўзброеным канфлікце. "Таму што арміі выйграюць бітвы, а народ атрымлівае перамогу ў вайне", - падкрэсліў Віктар Хрэнін.

Дзяржаўны сакратар Савета бяспекі Аляксандр Вальфовіч у размове з журналістамі тлумачыў, што народнае апалчэнне ў Беларусі будзе новым відам фарміраванняў, прызначаным для абароны краіны ў тым выпадку, калі ўзнікне такая неабходнасць. "Вядома ж, мы ўмацоўваем свае граніцы, іх ахову, мы бачым, наколькі сёння адбываецца мілітарызацыя і павышэнне ваеннай актыўнасці на тэрыторыі сумежных дзяржаў, краін-суседзяў. Мы бачым павелічэнне колькасці войскаў, груповак, колькасці вучэнняў, пралётаў разведвальнай авіяцыі - і не толькі з боку Захаду, але і з боку паўднёвай нашай суседкі, брацкай нам некалі Украіны, - канстатаваў дзяржсакратар. - Беларусь не нясе нікому пагрозы, але мы гатовы, робім усе крокі для абароны нашых заходніх і паўднёвых рубяжоў".

версія для друку

зрабіць стартавай

дабавіць у выбранае