Падзеі

2 лістапада, Віцебск /Міхаіл Маціеўскі - БЕЛТА/. Прэзідэнт Беларусі Аляксандр Лукашэнка прыбыў з рабочай паездкай у Віцебскую вобласць. Сёння кіраўнік дзяржавы плануе наведаць Віцебскі футравы камбінат, перадае карэспандэнт БЕЛТА.

На прадпрыемстве Аляксандру Лукашэнку даложаць аб выкананні даручэнняў па развіцці гарбарна-футравай вытворчасці, затым ён наведае некалькі цэхаў, дзе азнаёміцца з тэхналагічнымі працэсамі вырабу аўчыны і пушніны, вытворчасцю гатовых вырабаў і выстаўкай выпускаемай прадукцыі.

Віцебскі футравы камбінат працуе з 30 кастрычніка 1975 года. Гэта адзінае прадпрыемства ў краіне, якое спецыялізуецца на перапрацоўцы розных відаў пушніна-футравай сыравіны і пашыве з яе адзення, галаўных убораў і аксесуараў. У снежні 2013 года камбінат быў выкуплены абутковай кампаніяй "Марко" за адну базавую велічыню для яго рэканструкцыі, мадэрнізацыі і фінансавага аздараўлення. Праз некалькі месяцаў прадпрыемства было ўключана ў холдынг "Беларуская гарбарна-абутковая кампанія "Марко".

Цяпер магутнасці Віцебскага футравага камбіната даюць магчымасць перапрацоўваць 300 тыс. шкур аўчыны, 250 тыс. шкурак пушной сыравіны ў год і шыць з іх вырабы. За перыяд рэканструкцыі і мадэрнізацыі прадпрыемства асвоена Br43,5 млн інвестыцый у асноўны капітал, пастаўлена 401 адзінка тэхналагічнага абсталявання, створана больш за 300 рабочых месц.