Падзеі

"З асобнымі працэдурамі наогул незразумела, каму і для чаго яны былі неабходны. Ад іх трэба пазбаўляцца без усялякіх шкадаванняў. І мы ад іх пазбавіліся. Вы ведаеце, што дадаткам да адпаведнага дакумента, які я падпісаў, прапісаны ўсе працэдуры. Іншых больш не будзе. Гэта выключны пералік. Новы, скарочаны ў некалькі разоў пералік працэдур для бізнесу, калі гэта трэба, будзе мной зацвярджацца асабіста", - адзначыў Аляксандр Лукашэнка.

Прэзідэнт канстатаваў наяўнасць адпаведнага вопыту з Правіламі дарожнага руху. "Я заўважыў: квартал прайшоў - новыя правілы, новыя пункты. Пачынаю разбірацца: трэба гэта ці не трэба. Аказваецца, не трэба. Тады я забараніў уносіць змяненні міліцыі і ўзяў гэту функцыю на сябе. І вы ведаеце, з таго часу я адзін раз зацвердзіў правілы, і больш ніхто не прапаноўвае нічога. Таму што прапановы трэба абгрунтаваць", - сказаў ён.

На яго думку, даўно наспела неабходнасць пераходу на электронны фармат ажыццяўлення працэдур. Асабліва гэта датычыцца зямельных і маёмасных адносін, пытанняў распрацоўкі праектнай і будаўнічай дакументацыі. "Каб не трэба было вазіць паперкі з адной арганізацыі ў іншую. Дэкрэтам адменена абавязковасць наяўнасці друку ў арганізацыі. Пара адмаўляцца ад папяровых носьбітаў. Узровень сучасных IT-тэхналогій дае магчымасць адысці ад гэтых перажыткаў. Камусьці хочацца - калі ласка", - лічыць Аляксандр Лукашэнка.

Кіраўнік дзяржавы падкрэсліў, што ўраду неабходна вывучыць, як гэта працуе ў адпаведнасці з прынятым дэкрэтам аб лічбавай эканоміцы, і, калі прадпрыемствам ад гэтага прасцей, варта распаўсюдзіць вопыт на ўсю краіну.

"Словам, зроблена калі не ўсё, то вельмі шмат для таго, каб чалавек мог спакойна працаваць і ніхто яму не перашкаджаў. Толькі працаваць трэба добрасумленна, сачыць, каб на прадпрыемстве ўсё было ў парадку, плаціць падаткі - і пытанняў ніякіх не будзе. Аднак , калі заўтра, не дай бог, усплыве, што нехта вырашыў жульнічаць, асабліва пасля нашага дагавора, любымі праўдамі і няпраўдамі нажыцца за кошт здароўя людзей, бяспекі дзяржавы, гарантую: такіх людзей "страсянуць" - мала не падасца. Давайце жыць дружна", - сказаў на заканчэнне Прэзідэнт.