Падзеі

Лукашэнка павіншаваў удзельнікаў адкрытага чэмпіянату Беларусі па самба з пачаткам турніру

22 лютага, Мінск /Кар. БЕЛТА/. Кіраўнік дзяржавы, Прэзідэнт Нацыянальнага алімпійскага камітэта Аляксандр Лукашэнка павіншаваў удзельнікаў адкрытага чэмпіянату Беларусі па самба на прызы Прэзідэнта Рэспублікі Беларусь з пачаткам гэтага міжнароднага турніру, паведамілі БЕЛТА ў прэс-службе беларускага лідара.

У віншаванні гаворыцца, што спаборніцтвы па самаабароне без зброі, безумоўна, адно з самых відовішчных спаборніцтваў. Гэты від спорту, які імкліва набірае папулярнасць, па праву заслужыў прызнанне Міжнароднага алімпійскага камітэта.

"Перакананы, што гэты факт паслужыць для ўдзельнікаў нашага турніру дадатковым стымулам паказаць максімум сваіх магчымасцей, праявіць сілу характару і волю да перамогі, стаць лепшымі ў барацьбе за галоўны прыз", - падкрэсліў Прэзідэнт.

Кіраўнік дзяржавы пажадаў, каб добразычлівая атмасфера мінскага Палаца спорту, традыцыйна высокі ўзровень арганізацыі спаборніцтваў і актыўная падтрымка беларускіх балельшчыкаў садзейнічалі паспяховаму выступленню кожнага ўдзельніка чэмпіянату Беларусі.

Міжнародны турнір па самба 22 і 23 лютага збярэ ў Мінску каля 300 атлетаў, якія выступяць у спартыўнай і баявой дысцыплінах. Беларусь прадставяць 25 спартсменаў у дзевяці вагавых катэгорыях у мужчын і сямі - у жанчын. На дыван Палаца спорту выйдуць трыумфатар I Еўрапейскіх гульняў Сцяпан Папоў, шматразовыя чэмпіёны свету і Еўропы Андрэй Казусёнак і Юрый Рыбак.

Першыя фінальныя паядынкі пачнуцца сёння ў 17.30. Прэзідэнцкі спартыўны клуб заснаваў спецыяльныя прызы турніру - "За волю да перамогі" і "Лепшую тэхніку".

версія для друку

зрабіць стартавай

дабавіць у выбранае