Падзеі

Лукашэнка павіншаваў французаў з нацыянальным святам і падзякаваў за светлыя пачуцці да Беларусі

14 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка павіншаваў французскі народ з Нацыянальным святам Французскай Рэспублікі, паведамілі БЕЛТА ў прэс-службе беларускага лідара.

"Ваша дзяржава адыгрывае асаблівую ролю ў Еўропе і свеце, робіць неацэнны ўклад у справу бяспекі, развіцця гуманітарнага супрацоўніцтва і кантактаў паміж людзьмі. Мы ўдзячны звычайным французам за іх шчырыя сэрцы, дапамогу і светлыя пачуцці да Беларусі", - гаворыцца ў віншаванні.

Кіраўнік беларускай дзяржавы нагадаў, што ў гэтым годзе ў абедзвюх краінах адзначаюць гадавіны значных падзей дзвюх сусветных войнаў, якія знішчылі дзясяткі мільёнаў чалавечых лёсаў. "Трэба памятаць такія старонкі гісторыі, каб зразумець, якую высокую цану нашы народы заплацілі за незалежнасць. Быць асцярожнымі і разважлівымі, імкнучыся за кімсьці да змяненняў, каб пад гэтым сцягам не страціць больш, чым набыць", - звярнуў увагу беларускі лідар.

Аляксандр Лукашэнка адзначыў, што продкам беларусаў і французаў дапамаглі выстаяць, вярнуцца да нармальнага ладу жыцця велізарная любоў да сваёй радзімы, узаемная падтрымка, разуменне адзін аднаго. "Многія беларусы ваявалі за Францыю, французскія браты адстойвалі нашу беларускую зямлю. Мы, наследнікі пераможцаў, памятаем, цэнім і ганарымся гэтым", - падкрэсліў ён.

Прэзідэнт Беларусі пажадаў народу Францыі салідарнасці, упэўненасці ў заўтрашнім дні і мірнага неба над галавой.

версія для друку

зрабіць стартавай

дабавіць у выбранае