Падзеі

Лукашэнка: дзяржава як падтрымлівала ветэранаў, так і будзе іх падтрымліваць у далейшым

Фота з архiва

7 мая, Мінск /Кар. БЕЛТА/. Дзяржава як падтрымлівала ветэранаў, так і будзе іх падтрымліваць у далейшым. Аб гэтым Прэзідэнт Беларусі Аляксандр Лукашэнка заявіў сёння журналістам, перадае карэспандэнт БЕЛТА.

Напярэдадні на некаторых медыярэсурсах стала тыражавацца інфармацыя з гучнымі загалоўкамі аб тым, што дзяржава адмовілася ад выплат ветэранам да Дня Перамогі. Журналісты папрасілі Аляксандра Лукашэнку пракаменціраваць гэтыя звесткі. Прэзідэнт падкрэсліў: дзяржава як падтрымлівала ветэранаў, так і будзе іх падтрымліваць і ў далейшым. "Іх жа засталося зусім нічога. І гэта нашы скрэпы, як модна цяпер гаварыць. Гэта наша аснова. Пакуль жывыя яны, у нас ёсць хаця б вось такая адна цвёрдая кропка апоры для таго, каб захавацца і захаваць нашу дзяржаву", - заявіў Аляксандр Лукашэнка.

"Мы штомесяц ім даплачваем і падтрымліваем. І гэта няпраўда, што мы іх разава не падтрымаем: у нас тры выплаты штомесяц і разавыя ёсць выплаты. І мы выдзелілі немалыя сродкі, каб падтрымаць удзельнікаў вайны, блакаднікаў Ленінграда, працаўнікоў тылу і іншых - каля 65 мільёнаў рублёў выдзелена. І гэтыя разавыя выплаты ўдзельнікі вайны абавязкова атрымаюць да Дня Перамогі. Калі нехта да 9 мая не паспее атрымаць, я ім кампенсую на працягу 9-га, 10-га, 11-га чысла", - запэўніў кіраўнік дзяржавы.

На яго думку, такія навіны пачынаюць актыўна распаўсюджвацца з-за таго, што апазіцыя не можа сфармуляваць свой парадак дня і спрабуе зачапіцца за любую магчымасць дыскрэдытаваць уладу, часам за самую дробязь. Пасля гэтага нават пачалі гучаць заклікі збіраць грошы на выплаты ветэранам. "Гэта ўжо якое абяцанне пасля канца мінулага года? Яны ўсё абяцаюць і абяцаюць: пратэстунам, забастоўшчыкам, пацярпелым. Каму далі? Дакладна гэтак "дадуць" і цяпер", - сказаў Прэзідэнт. Ён таксама заўважыў, што прадстаўнікі апазіцыі паехалі за мяжу толькі з адной мэтай: перахапіць там фінансавыя патокі, якія ідуць у Беларусь для падтрымкі пратэстаў. Утрымліваецца ж беларуская апазіцыя за мяжой за кошт падаткаплацельшчыкаў заходніх краін і фондаў, створаных там для знішчэння канкурэнтаў.

"Не трэба збіраць грошы нашым ветэранам. Ад іх яны грошы не возьмуць: гэта крывавыя грошы. Гэтыя людзі, якія ходзяць з палотнішчамі, здраднікі і калабарацыяністы, для іх не сябры і не памочнікі. Гэта ўжо ад вар'яцтва і неразумнасці яны пачынаюць такімі справамі займацца. Трэба было, перш чым нешта зрабіць у гэтым плане ("Будзем збіраць грошы"), падумаць, а ці возьмуць ветэраны гэтыя грошы. У іх яны не возьмуць, нават калі будуць паміраць з голаду. Ніколі", - падкрэсліў беларускі лідар.

Як дзяржава падтрымлівае ветэранаў?

На сацыяльныя паслугі ветэранам Вялікай Айчыннай вайны і грамадзянам, якія пацярпелі ад яе наступстваў, у 2021 годзе будзе накіравана больш за Br6 млн.

Штогод у краіне праводзіцца абследаванне матэрыяльна-бытавых умоў жыцця гэтай катэгорыі грамадзян. У бягучым годзе заяўкі паступілі ад 852 чалавек (рамонт жылых памяшканняў, печаў, электраправодкі, газавага абсталявання, мыццё акон, забеспячэнне пячным палівам, колка дроў, прыбіранне прыдамавой тэрыторыі, апрацоўка прысядзібнага ўчастка). Да 1 мая работы па ўсіх зваротах былі выкананы. На 2021 год на гэтыя мэты ў бюджэце прадугледжана больш за Br1 млн.

Сацыяльнымі паслугамі дома карыстаюцца 647 ветэранаў і 1,4 тыс. грамадзян, якія пацярпелі ад наступстваў вайны. Па рашэнні мясцовых выканаўчых і распарадчых органаў усе ветэраны Вялікай Айчыннай вайны вызвалены ад платы за сацыяльнае абслугоўванне дома. Акрамя таго, за 711 грамадзянамі ажыццяўляецца індывідуальны догляд членаў сям'і, якім штомесяц выплачваецца дапамога па доглядзе ў памеры бюджэту пражытачнага мінімуму (Br273).

У дамах-інтэрнатах кругласутачную сацыяльную і медыцынскую дапамогу атрымліваюць 132 чалавекі названых катэгорый.

У сукупнасці расходы на сацыяльнае абслугоўванне ветэранаў вайны і грамадзян, якія пацярпелі ад наступстваў вайны, складаюць Br5 млн у год.

Іншыя сацыяльныя льготы для ветэранаў уключаюць бясплатнае забеспячэнне лекавымі сродкамі, што выдаюцца па рэцэптах урачоў; бясплатны выраб i рамонт зубных пратэзаў у дзяржарганізацыях па месцы жыхарства; бясплатнае забеспячэнне тэхнічнымі сродкамі сацыяльнай рэабілітацыі; першачарговае бясплатнае санаторна-курортнае лячэнне або аздараўленне (пры адсутнасці медыцынскіх проціпаказанняў).

Акрамя таго, у іх ёсць права на бясплатны праезд на ўсіх відах гарадскога пасажырскага транспарту, у прыгарадным чыгуначным, водным і аўтамабільным пасажырскім транспарце; бясплатны праезд адзін раз у год у пасажырскіх паяздах або вагонах фармiравання Беларускай чыгункі ва ўнутрырэспубліканскіх зносінах альбо з 50-працэнтнай скідкай ад кошту праезду раз у год на ўнутраных лiнiях воднага, паветранага або аўтамабільнага пасажырскага транспарту агульнага карыстання рэгулярных міжгародніх зносін.

Ветэраны таксама карыстаюцца 50-працэнтнай скідкай па аплаце паслуг ЖКГ - за тэхнічнае абслугоўванне, карыстанне жылымі памяшканнямі, тэхнічнае абслугоўванне ліфта і камунальныя паслугі, карыстанне кватэрным тэлефонам.

версія для друку

зрабіць стартавай

дабавіць у выбранае