Падзеі

13 снежня, Аліна Грышкевіч - БЕЛТА/. Прэзідэнт Беларусі Аляксандр Лукашэнка ў ходзе II З'езда вучоных даручыў на працягу першага паўгоддзя 2018 года выпрацаваць комплексную сістэму матывацыі навуковай і педагагічнай дзейнасці з улікам рэальнай сітуацыі ў эканоміцы, перадае карэспандэнт БЕЛТА.

Такое даручэнне кіраўнік дзяржавы даў, выслухаўшы выступленне рэктара Беларускага дзяржаўнага эканамічнага ўніверсітэта Уладзіміра Шымава. Кіраўнік ВНУ прапанаваў выпрацаваць дакладны алгарытм, увязаўшы зарплату прафесарска-выкладчыцкага складу з сітуацыяй у эканоміцы краіны.

Аляксандр Лукашэнка адзначыў, што Уладзімір Шымаў працаваў раней міністрам эканомікі, добра валодае гэтымі пытаннямі, таму няхай у ВНУ і прапрацуюць гэта пытанне.

Уладзімір Шымаў у сваім выступленні звярнуў увагу на важнасць развіцця ўніверсітэцкай навукі, забеспячэння кадравага патэнцыялу вышэйшай школы.