Падзеі

Лукашэнка: Беларусь, як і раней, выступае за прадаўжэнне ўсебаковага супрацоўніцтва з Эстоніяй

24 лютага, Мінск /Кар. БЕЛТА/. Кіраўнік дзяржавы Аляксандр Лукашэнка ад імя Рэспублікі Беларусь і сябе асабіста павіншаваў народ Эстонскай Рэспублікі з нацыянальным святам. Аб гэтым БЕЛТА паведамілі ў прэс-службе Прэзідэнта.

"З'яўленне ў мінулым стагоддзі на палітычнай карце свету самастойнай эстонскай дзяржавы дало пачатак яе навейшай гісторыі. Самавызначэнне - гэта не толькі прывабныя перспектывы, але і адказнасць за лёс свайго народа. Яно дэманструе сталасць і нязломную веру ў будучыню для нашчадкаў", - гаворыцца ў віншаванні.

Прэзідэнт адзначыў, што Мінск і Талін больш за чвэрць стагоддзя знаходзяцца ў новых рэаліях, якія стварылі дадатковыя магчымасці для прадпрыемстваў, устаноў і простых людзей. "Разам з тым гады незалежнасці не пазбавілі нас усяго цэннага і неабходнага, што было назапашана многімі пакаленнямі нашых суайчыннікаў, - падкрэсліў Аляксандр Лукашэнка. - Беларусь, як і раней, выступае за прадаўжэнне ўсебаковага супрацоўніцтва з Эстоніяй, эфектыўнае выкарыстанне чалавечага патэнцыялу і ўнікальнага вопыту шматгадовай сумеснай працы. Сёння перш за ўсё мы павінны ўзаемадзейнічаць для бяспекі ў рэгіёне і ўпэўненасці ў заўтрашнім дні для нашых дзяцей. Беларусы заўсёды былі і застануцца вашымі добрымі суседзямі, гатовымі разам забяспечваць дасягненне такой важнай мэты".

Кіраўнік беларускай дзяржавы пажадаў усім грамадзянам Эстоніі поспехаў, міру і дабрабыту.

версія для друку

зрабіць стартавай

дабавіць у выбранае