Падзеі

Лукашэнка: Беларусь чакае ад Швейцарыі па-сапраўднаму аб'ектыўнай, узважанай і прагматычнай пазіцыі

Фота з архiва

1 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка павіншаваў Федэральнага прэзідэнта Швейцарскай Канфедэрацыі Алена Берсэ з нацыянальным святам - Днём заснавання Канфедэрацыі. Аб гэтым БЕЛТА паведамілі ў прэс-службе беларускага лідара.

"Гісторыя Беларусі і Швейцарыі непарыўна звязана з іх геаграфічным становішчам на скрыжаванні стратэгічна важных шляхоў, абедзвюм дзяржавам уласціва этнічная і канфесійная разнастайнасць. Нас вельмі многае аб'ядноўвае", - гаворыцца ў віншаванні.

Кіраўнік дзяржавы выказаў упэўненасць, што народы абедзвюх краін маюць выдатны патэнцыял для пашырэння двухбаковых сувязей у эканамічнай, навуковай, адукацыйнай, культурнай і спартыўнай сферах, у тым ліку дзякуючы сур'ёзным напрацоўкам мінулых гадоў.

"У гэтым сэнсе не могуць не турбаваць актуальныя тэндэнцыі ў Швейцарыі, якія негатыўна ўплываюць на развіццё нашага ўзаемадзеяння. У першую чаргу гэта датычыцца далучэння да несправядлівых і нелегітымных абмежавальных мер ЕС супраць Беларусі, - звярнуў увагу Прэзідэнт. - Чакаем ад швейцарскіх партнёраў па-сапраўднаму аб'ектыўнай, узважанай і прагматычнай пазіцыі ў адносінах да Рэспублікі Беларусь, пацвярджаем нязменную гатоўнасць да супрацоўніцтва на прынцыпах раўнапраўя і ўзаемнай павагі для аднаўлення міру і бяспекі ў рэгіёне і свеце".

Аляксандр Лукашэнка пажадаў Алену Берсэ і шматнацыянальнаму народу Швейцарыі далейшага працвітання і дабрабыту.

версія для друку

зрабіць стартавай

дабавіць у выбранае