Падзеі

Лукашэнка адказаў на пытанне аб магчымай глыбіні інтэграцыі з Расіяй

Фота з архiва

9 верасня, Мінск /Кар. БЕЛТА/. Прэзідэнт Беларусі Аляксандр Лукашэнка 8 верасня ў інтэрв'ю вядучым расійскім СМІ адказаў на пытанне аб магчымай глыбіні інтэграцыі з Расіяй, паведамляе карэспандэнт БЕЛТА.

Кіраўнік дзяржавы адзначыў, што наконт эканамічнай інтэграцыі з Расіяй народ Беларусі раней выказаўся на рэферэндуме, адказаўшы на гэта пытанне станоўча. Больш таго, бакі пайшлі далей у развіцці супрацоўніцтва, вынікам чаго стаў заключаны Дагавор аб стварэнні Саюзнай дзяржавы. Ён быў падпісаны яшчэ першым Прэзідэнтам Расіі Барысам Ельцыным, а абмен ратыфікацыйнымі граматамі адбыўся ўжо пры Уладзіміру Пуціне. "Там было прапісана ўсё, - падкрэсліў Аляксандр Лукашэнка. - Там мы пайшлі нават далей. Мы прапісалі контуры. Чаму мы гаворым Саюзная дзяржава - гэта былі контуры будучай дзяржавы саюзнай. Там жа было ўсё".

Прэзідэнт нагадаў, што ў адным з апошніх артыкулаў дагавора ідзе размова аб тым, каб на рэферэндумах у Беларусі і Расіі прыняць Канстытуцыйны акт Саюзнай дзяржавы. "Вы ведаеце, чаму мы на гэта не пайшлі. Тады ўсе баяліся - вы, што Лукашэнка прыбяжыць і схопіць "шапку Манамаха". Што, не так? І расіянам у мазгі гэта ўбілі і гэтак далей, і да таго падобнае. Вы, не беларусы, не я не пайшлі тады на рэферэндум, - сказаў кіраўнік дзяржавы. - Абстаноўка тады была іншая. А цяпер два пакаленні пасля гэтага вырасла. Яны іншыя. І сёння немагчыма ўжо тую інтэграцыю рэалізаваць, якая была прапісана ў саюзным дагаворы. Таму мы з Прэзідэнтам Расіі пачалі абмяркоўваць так званыя карты, каб прыстасаваць да цяперашніх умоў і выпрацаваць новыя шляхі інтэграцыі".

"Гэта мы пачалі напярэдадні парламенцкіх выбараў (яны былі ў лістападзе мінулага года). І вось мы ўлезлі ў прэзідэнцкія. Ужо не да гэтага. Бачыце, якая сумятня. Нехта крычыць: а, здае Расіі Беларусь! Нехта яшчэ чагосьці там... І мы спыніліся", - растлумачыў Аляксандр Лукашэнка.

Разважаючы аб магчымай глыбіні інтэграцыі, Прэзідэнт сказаў: "Мы з вамі суверэнныя незалежныя дзяржавы. Хто нам перашкаджае быць суверэннымі і незалежнымі? У нас вельмі цесная эканамічная кааперацыя. Хто перашкаджае? У нас у ваенных адносінах адзіная армія".

"Чаму нехта там на Пуціна накатвае, што ён стварыў па маёй просьбе рэзерв (сілавікоў. - Заўвага БЕЛТА), які, дарэчы, не выкарыстоўваўся. Дай бог і выкарыстоўвацца не будзе. Але гэта ў дагаворы запісана. І калі б нехта ажыццяўляў агрэсію супраць Расіі праз Беларусь або побач з Беларуссю (а зона адказнасці наша ў АДКБ і Саюзнай дзяржаве - Захад), беларуская армія - 65 тыс. штыкоў - уступае ў вайну. І расійская групоўка (яна таксама прапісана па плану) нас падтрымлівае, разам з намі адбівае агрэсію на заходнім напрамку. Гэта наша зона адказнасці. І калі б раптам гэта здарылася, мы неадкладна б абаранялі Расію. Гэтак, як Расія стварыла рэзерв сёння. Таму што на знешніх граніцах вы паглядзіце, што робіцца", - расказаў беларускі лідар.

Аляксандр Лукашэнка звярнуў увагу, што Захаду больш за ўсё патрэбна Расія, а не Беларусь, якая разглядаецца толькі ў якасці трампліна. "Таму кіраўніцтва Расіі цудоўна разумее, што нельга, як Украіну, палажыць Беларусь пад Амерыку. Чаму? Таму што санітарны кардон - 1 тыс. км", - заявіў Прэзідэнт.

Ён адзначыў, што ў свой час, стаўшы першым Прэзідэнтам Беларусі, не даў ажыццявіцца планам па стварэнні такога санітарнага кардона ў складзе прыбалтыйскіх краін, Беларусі і Украіны, які аддзяліў бы Расію. "Вось у чым нянавісць амерыканцаў да мяне. З тых першых гадоў. Я Сораса на парог не пусціў. А вы з ім дружылі. Я ўжо не гавару пра Украіну. Вы з ім дружылі - тыя, хто каля Барыса Мікалаевіча (Ельцына. - Заўвага БЕЛТА) бегаў. Не буду называць прозвішчы, вы іх ведаеце, яны і цяпер у вас там ходзяць. Спытайце ў Пуціна, колькі ва ўрадзе і Крамлі сядзела ЦРУшнікаў...", - сказаў Аляксандр Лукашэнка.

Што датычыцца глыбіні інтэграцыі, то, паводле слоў кіраўніка дзяржавы, няма ніякіх пытанняў з пункту гледжання эканамічнай інтэграцыі. "Ніякіх няма праблем. Галоўнае - раўнапраўная аснова. Не ўсё аб'яднаць і напалам падзяліць, гэта - глупства, мы падавімся ад гэтага куска. Павінна быць раўнапраўная аснова", - падкрэсліў Прэзідэнт.

Прадстаўнікі СМІ ў яго пацікавіліся, а як з пункту гледжання ваеннага і палітычнага, дзе тут патэнцыяльная глыбіня інтэграцыі. "Вы ведаеце, я не думаю, што нам сёння трэба ламаць тыя структуры ў палітыцы, якія ёсць. У нас ёсць Вышэйшы Дзяржаўны савет. Прапісаны яго функцыі і паўнамоцтвы. Каласальныя. Але Вышэйшы Дзяржсавет не функцыянуе на поўную сваіх паўнамоцтваў. Саюзны Саўмін у нас ёсць - агульны ўрад. У нас ёсць міжведамасныя саветы. Яны не працуюць так, як належыць. Перш чым гарадзіць плот і ствараць нешта новае, давайце гэта задзейнічаем. І калі мы ўбачым, што мала, мы зробім яшчэ адзін крок. Але яны не задзейнічаны, яны не працуюць. Вы хочаце сказаць, што я ці Беларусь вінаватая? Падумайце над адказам самі", - заявіў Аляксандр Лукашэнка.

Ён прапанаваў у гэтым плане ісці ад жыцця і дзейнічаць так, каб цяперашнія палітычныя структуры, якія ўжо ёсць, дзейнічалі. "Там кансэнсус пры прыняцці рашэнняў. У кожнага па адным голасе. Два прэзідэнты, два прэм'ер-міністры і кіраўнікі парламентаў. Гэта Вышэйшы Дзяржаўны савет. Прымаем рашэнне і дзейнічаем. Але прымаем рашэнне і часта не рэалізоўваем. Дайшлі да таго, што разгарнулі газавыя, малочныя, цукерачныя, нафтавыя войны. Дайшлі да абсурду, - адзначыў Аляксандр Лукашэнка. - Мы з гэтай сітуацыі (што склалася цяпер. - Заўвага БЕЛТА), спадзяюся, атрымалі ўрок. У тым ліку і мы - прэзідэнты дзвюх краін".

Што датычыцца ваеннага складніка, то тут, паводле слоў беларускага лідара, краіны дзейнічаюць разам. "Не абмяркоўваецца! Неяк на перагаворах з Уладзімірам Уладзіміравічам паўгода таму, абмяркоўваючы гэту тэму, мы прыйшлі да такога меркавання, па-мужчынску скажу: можам сабачыцца па любых пытаннях, але абарона і бяспека - святое. І вось гэтыя падзеі паказалі, што гэта для нас святое, - заявіў Прэзідэнт. - Помніце, я гаварыў, а вы пасмейваліся, год таму, што, магчыма, настануць такія часы, што нам з табой (Пуціным) давядзецца стаяць плячо ў плячо і адстрэльвацца. А вы гэта за жарт прынялі. А вось бачыце, жыццё як павярнулася".

"Тое, што адбываецца ў Беларусі... Расслабляцца не трэба. Гэта толькі, як я часта гавару сваім, пачатак. Гэта не палякі. Гэта за нас узяліся, за Беларусь (а праз Беларусь за Расію) ведаеце, якія сілы. І спрашчаць нічога нельга", - рэзюмаваў Аляксандр Лукашэнка.

версія для друку

зрабіць стартавай

дабавіць у выбранае