Падзеі
Лукашэнка аб закліках да забастовак на прадпрыемствах: калі спынімся, ніколі не раскруцім сваю вытворчасць
14 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка пракаменціраваў спробы расхіствання працоўных калектываў у краіне і папярэдзіў, што забастоўкі могуць вельмі негатыўна паўплываць на будучую работу прадпрыемстваў. Аб гэтым ён заявіў сёння на нарадзе па рабоце будгаліны, перадае карэспандэнт БЕЛТА.
"Для пачатку, я пакуль жывы і не за мяжой, як тут некаторыя нашы паважаныя "свядомыя" раскручваюць: Прэзідэнт пакінуў краіну і знаходзіцца за мяжой. Сёння 14-е чысло, мы з вамі сустракаемся для таго, каб абмеркаваць работу будаўнічай галіны", - адзначыў кіраўнік дзяржавы ў пачатку нарады.
Аляксандр Лукашэнка канстатаваў, што цяпер у краіне спрабуюць расхістаць працоўныя калектывы. "Вы гэта добра ведаеце, адчуваеце. Зразумела, працоўныя калектывы - гэта аснова нашай краіны. Вы маю пазіцыю ведалі і ведаеце. У часы пандэміі, калі я практычна забараніў звальняць людзей, выкідваючы іх на вуліцу. Цяжка, складана, але і цяпер няпроста. Малайцы будаўнікі, у іх больш простая сітуацыя, яны ўсе заняты справай. Але, тым не менш, спрабуюць і будаўнікоў там хіснуць і гэтак далей. Наша пазіцыя адназначная: мы ў цяжкія часы пандэміі нікога не нахілялі, не прымушалі. І тут таксама мы нікога не павінны трымаць. Калі людзі хочуць працаваць - калі ласка. Вось работа, прыходзьце, працуйце. Калі чалавек не хоча працаваць, мы ж яго на аркане не зацягнем", - адзначыў Прэзідэнт.
Аб магчымых наступствах забастовак кіраўнік дзяржавы расказаў на канкрэтных прыкладах. У выпадку з "Беларуськаліем", калі спыніць гэта прадпрыемства, якое нармальна працуе, на некалькі дзён, то гэта будзе на руку асноўным канкурэнтам у Расіі і Канадзе. "Калі яны забастуюць на два дні, то канкурэнты - расіяне і канадцы - перахрысцяцца. І хуценька на рынак паставяць тое, што яны хочуць паставіць", - сказаў Аляксандр Лукашэнка.
Аналагічна і адносна работы машынабудаўнічых прадпрыемстваў, такіх як МТЗ, МАЗ і іншыя. "Калі ласка. Вы сёння не вырабіце 10 трактароў, не паставіце на рынак, заўтра немцы прыедуць з амерыканцамі, прывязуць сваю тэхніку расіяне. Таксама перахрысцяцца", - адзначыў Прэзідэнт.
Ён падкрэсліў, што эканоміка ў свеце толькі пачынае ажываць пасля абмежаванняў, звязаных з пандэміяй. "І ўсе змагаюцца за гэтыя рынкі. Калі мы спынімся, ніколі не раскруцім сваю вытворчасць. Ніколі! Нас яшчэ ў гэта балота і падштурхнуць. Людзям трэба гэта растлумачыць: хочаце - бастуйце, хочаце працаваць - працуйце".
"Як мне далажылі, на МАЗе або МТЗ быў прыклад адзін: там 20 чалавек вырашылі выказаць сваё меркаванне, кінулі работу і пайшлі. Загадчык вытворчасці гаворыць: добра, ідзіце, у мяне людзей хапае, уся гэта зарплата вось гэтых людзей. Завярнуліся, назад пайшлі на работу", - адзначыў кіраўнік дзяржавы.
"Людзям трэба сказаць, што гэта адзіны шанц у іх выратаваць прадпрыемства. Ратуючы прадпрыемства, будзеш карміць сваю сям'ю. На вуліцы можна пахадзіць. Вунь іх, тысячамі ходзяць. Можна далучыцца, пахадзіць. Але там грошай калі і дадуць, то на два дні. Там некаторым прыплачваюць. Мы іх ведаем, мы паказвалі іх. Ну на два дні дадуць. А потым што?" - заўважыў Аляксандр Лукашэнка.
"З такой пазіцыі трэба падыходзіць да людзей, у тым ліку ў будаўнічай галіне. Таму што будаўнікі - гэта прагрэсіўны, баявіты народ. Але ім трэба адкрываць вочы, што будзе потым. У нас будаўнікі пастаянна былі ў балоце. Мы іх выцягвалі, ужо каторы раз, за вушы. Заказы з'явіліся, работа з'явілася, прырост з'явіўся вытворчасці - працуйце", - рэзюмаваў Прэзідэнт.
версія для друку
зрабіць стартавай
дабавіць у выбранае