Падзеі

Лукашэнка аб выніках пасяджэння VII УНС: у летапіс дзяржаўнага будаўніцтва ўпісана новая старонка

25 красавіка, Мінск /Кар. БЕЛТА/. У летапіс дзяржаўнага будаўніцтва ўпісана новая старонка. Аб гэтым Прэзідэнт Беларусі, старшыня VII Усебеларускага народнага сходу Аляксандр Лукашэнка заявіў 25 красавіка, падводзячы вынікі першага пасяджэння VII УНС, перадае карэспандэнт БЕЛТА.

Кіраўнік дзяржавы адзначыў, што ўсе ўключаныя ў парадак дня пасяджэння пытанні былі разгледжаны.

"Будзем лічыць, што мы яшчэ вяршыні ў нашай рабоце не дасягнулі. Абяцаю, што дасягнем. Завяршылася работа першага пасяджэння VII Усебеларускага народнага сходу, сфарміраванага ў новым канстытуцыйным статусе. У летапіс дзяржаўнага будаўніцтва ўпісана новая старонка", - заявіў Аляксандр Лукашэнка.

Прэзідэнт падкрэсліў, што вялікае бачыцца на адлегласці, УНС цяпер толькі ў пачатку вялікага шляху.

"Мы, народ Беларусі, зыходзячы з адказнасці за сучаснасць і будучыню краіны, жадаючы забяспечыць мір і згоду, дабрабыт нашых грамадзян, непахіснасць народаўладдзя, незалежнасць і працвітанне нашай Беларусі, прынялі дакументы стратэгічнага планавання: Канцэпцыю нацыянальнай бяспекі і Ваенную дактрыну нашай дзяржавы. У гэтых дакументах нашы імкненні і надзеі", - адзначыў Аляксандр Лукашэнка.

Такім чынам у час пасяджэння быў закладзены прававы фундамент прававой бяспекі Беларусі. "Гэта залог выканання жаданняў мільёнаў беларусаў. Упэўнены, прынятыя рашэнні паслужаць трывалай асновай для захавання беларускага народа як унікальнай гістарычнай супольнасці і прымнажэння нацыянальнага здабытку, створанага цэлымі пакаленнямі", - заявіў кіраўнік дзяржавы.

Але адных рашэнняў недастаткова, заўважыў ён. "Наперадзе самае галоўнае - карпатлівая работа. І тут я хачу ўберагчы вас ад абыякавасці. Быць дэлегатам УНС - гэта ў першую чаргу несці адказнасць за лёс краіны. Выступаць барометрам грамадскіх настрояў. Быць прынцыповым у абароне нацыянальных інтарэсаў. Усім нам трэба будзе даць справаздачу аб сваёй рабоце. Далажыць тым, хто вас дэлегаваў, па ўсіх пытаннях, якія разглядаліся. Данесці да кожнага, як важна сёння быць моцнымі, адзінымі і з'яднанымі ў адстойванні інтарэсаў роднай краіны. Вас дэлегавалі - значыць, вам давяраюць, да вас прыслухоўваюцца. Выкарыстоўвайце гэты давер на карысць працвітання нашай роднай зямлі. Умацоўвайце свой аўтарытэт справамі, падтрымлівайце ініцыятывы людзей, дапамагайце ім аб'яднацца для гэтага", - заклікаў дэлегатаў беларускі лідар.

версія для друку

зрабіць стартавай

дабавіць у выбранае