Падзеі

6 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка ў канцы ліпеня зробіць візіт ва Украіну. Аб гэтым паведаміла сёння журналістам прэс-сакратар кіраўніка беларускай дзяржавы Наталля Эйсмант, перадае карэспандэнт БЕЛТА.

"Магу адназначна пацвердзіць, што ён плануецца ў самы бліжэйшы час. Прадугледжваецца, што ў канцы ліпеня", - сказала Наталля Эйсмант.

Як паведамлялася, раней, у час красавіцкай сустрэчы з кіраўніком беларускай дзяржавы, Пётр Парашэнка запрасіў Аляксандра Лукашэнку зрабіць гэтым летам афіцыйны візіт ва Украіну. Паводле яго слоў, беларускаму і ўкраінскаму бакам трэба было распрацаваць парадак дня і падрыхтаваць неабходныя дакументы, падпісанне якіх будзе садзейнічаць пашырэнню супрацоўніцтва паміж дзяржавамі.

На парадку дня двухбаковага супрацоўніцтва таксама бізнес-форум і пасяджэнне беларуска-ўкраінскага кансультатыўнага савета дзелавога супрацоўніцтва, якія, як чакаецца, пройдуць 20-21 ліпеня ў Кіеве. Аб гэтым паведамляецца на сайце Беларускай гандлёва-прамысловай палаты. У час бізнес-форуму будуць разгледжаны актуальныя пытанні ўзаемадзеяння дзелавых колаў дзвюх краін, плануецца падпісанне двухбаковых кантрактаў і пагадненняў. На кансультатыўным савеце плануецца разгледзець перспектыўныя напрамкі развіцця беларуска-ўкраінскага гандлёва-эканамічнага ўзаемадзеяння ў рамках функцыянавання ЕАЭС і ўзаемадзеяння Украіны з Еўрапейскім саюзам, абмеркаваць праблемныя пытанні вядзення бізнесу, правесці абмен думкамі і вопытам рэалізацыі сумесных праектаў.