Падзеі

12 ліпеня, Мінск /Кар. БЕЛТА/. Намеснік міністра замежных спраў Алена Купчына 11 ліпеня на сустрэчы кіраўнікоў МЗС краін - удзельніц ініцыятывы "Усходняе партнёрства" падкрэсліла важнасць дыялогу паміж ЕАЭС і ЕС. Аб гэтым БЕЛТА паведамілі ў прэс-службе беларускага знешнепалітычнага ведамства.

Асноўная ўвага на сустрэчы, якая адбылася ў Кіеве ў ходзе сёмага раўнда нефармальных міністэрскіх дыялогаў УП, была ўдзелена разгляду перспектыў ініцыятывы і ўзаемадзеяння ў шматбаковым фармаце ініцыятывы, а таксама праблематыцы рэгіянальнай бяспекі. Удзельнікі сустрэчы абмеркавалі актуальныя пытанні міжнароднага парадку дня. "У ходзе пленарнай дыскусіі кіраўнік беларускай дэлегацыі выклала падыходы Беларусі да супрацоўніцтва ва "Усходнім партнёрстве". У прыватнасці, падкрэсліла неабходнасць большай дыферэнцыяцыі і павышэння рэзультатыўнасці ініцыятывы шляхам рэалізацыі канкрэтных праектаў, а таксама важнасць наладжвання дыялогу і ўзаемадзеяння паміж Еўразійскім эканамічным саюзам і Еўрапейскім саюзам", - адзначылі ў прэс-службе.

У час мерапрыемства адбыліся рабочыя кантакты Алены Купчыной з кіраўнікамі дэлегацый іншых краін-партнёраў, камісарам па Еўрапейскай палітыцы суседства і перагаворах аб пашырэнні Ёханесам Ханам і намеснікам генеральнага сакратара Еўрапейскай службы знешніх дзеянняў Хельгай Шмід. "Абмеркавана шырокае кола пытанняў двухбаковага і шматбаковага супрацоўніцтва, у тым ліку развіцця адносін паміж Беларуссю і Еўрапейскім саюзам", - праінфармавалі ў прэс-службе.