Падзеі

Кітай збіраецца пабудаваць у Беларусі яшчэ 20 сацыяльных дамоў

3 лютага, Мінск /Кар. БЕЛТА/. Кітай збіраецца пабудаваць у Беларусі яшчэ 20 сацыяльных дамоў. Адпаведнае пагадненне аб рэалізацыі праекта "Будаўніцтва сацыяльнага жылля (трэці этап)" падпішуць урады Беларусі і Кітая. Гэта прадугледжана пастановай Савета Міністраў ад 1 лютага 2021 года нумар 63, якая афіцыйна апублікавана на Нацыянальным прававым інтэрнэт-партале, паведамляе БЕЛТА.

У цэлым плануецца пабудаваць 166 кватэр сацыяльнага жылля ў 20 дамах. Агульная плошча забудовы складзе прыкладна 66 тыс. кв.м. Кватэры атрымаюць грамадзяне, якія знаходзяцца на ўліку маючых патрэбу ў паляпшэнні жыллёвых умоў і маюць права на атрыманне жылля сацыяльнага карыстання.

Расходы па будаўніцтве не павінны перасягнуць 222 млн кітайскіх юаняў, расходы кіруючай праектам кітайскай кампаніі складуць не больш за 15,52 млн кітайскіх юаняў. Яны будуць фінансавацца за кошт тэхніка-эканамічнай дапамогі Кітая.

На падпісанне пагаднення з беларускага боку ўпаўнаважана Міністэрства эканомікі.

версія для друку

зрабіць стартавай

дабавіць у выбранае