Падзеі
Каранкевіч расказаў, як будзе выбудавана сістэма абыходжання з адпрацаваным ядзерным палівам БелАЭС
Фота з архiва
4 чэрвеня, Масква /Эдуард Півавар - БЕЛТА/. Міністр энергетыкі Беларусі Віктар Каранкевіч 4 чэрвеня ў Маскве на пасяджэнні Камісіі Парламенцкага сходу Саюза Беларусі і Расіі па энергетыцы расказаў, як будзе выбудавана сістэма абыходжання з адпрацаваным ядзерным палівам БелАЭС, перадае карэспандэнт БЕЛТА.
Міністр нагадаў, што міжурадавым пагадненнем Беларусі і Расіі аб супрацоўніцтве ў галіне абыходжання з адпрацаваным ядзерным палівам ад 21 лістапада 2022 года прадугледжана заключэнне рамачнага кантракта на забеспячэнне бяспечнага абыходжання з адпрацаваным ядзерным палівам Беларускай АЭС. Гэты кантракт павінен вызначыць аб'ём супрацоўніцтва, правы і абавязкі ўпаўнаважаных і прыцягнутых арганізацый, фінансавыя і іншыя аспекты партнёрства. "Прапрацоўваюцца магчымасці стварэння ў рэспубліцы накапляльнай пляцоўкі для захоўвання адпрацаванага ядзернага паліва Беларускай АЭС, уключаючы збудаванне прамежкавага сховішча кантэйнернага тыпу. Гэта дасць магчымасць аптымізаваць транспартна-тэхналагічныя аперацыі, звязаныя з падрыхтоўкай і далейшай адпраўкай адпрацаванага ядзернага паліва на перапрацоўку ў Расійскую Федэрацыю", - паведаміў ён.
Паводле яго слоў, сумесная работа ў гэтай сферы вядзецца з прыцягненнем шырокага кола зацікаўленых - профільных міністэрстваў, ведамстваў, спецыялізаваных арганізацый. Прадаўжаюцца даследчыя і пошукавыя работы па выбары прыярытэтнай пляцоўкі для размяшчэння ў Беларусі пункта пахавання радыеактыўных адходаў. Пры распрацоўцы перадпраектнай і праектнай дакументацыі для выканання тэхналагічнай часткі праекта і распрацоўкі яго фізічнай абароны ў якасці кансультанта, распрацоўшчыка і пастаўшчыка тэхналогій, улічваючы вялікі практычны вопыт у гэтым напрамку, плануецца задзейнічаць спецыялізаваныя арганізацыі дзяржкарпарацыі "Расатам". "Праводзяцца кансультацыі з расійскім бокам па пытаннях распрацоўкі і падпісання міжурадавага пагаднення, якія датычыцца праектавання і збудавання гэтага аб'екта", - расказаў Віктар Каранкевіч.
Ён таксама паведаміў, што рыхтуецца новая праграма Саюзнай дзяржавы па пытаннях забеспячэння бяспекі ў сферы абыходжання з радыеактыўнымі адходамі: адказным выканаўцам ад беларускага боку выступае Міністэрства па надзвычайных сітуацыях.
"Пытанні ядзернай і радыяцыйнай бяспекі застаюцца для Беларусі безумоўным прыярытэтам. Гэта нязменнае патрабаванне кіраўніка дзяржавы. У гэтым напрамку праведзена сур'ёзная работа ў рамках збудавання БелАЭС, у тым ліку па фарміраванні сістэмы ядзернай і радыяцыйнай бяспекі і яе важнейшых элементаў. У сваёй далейшай рабоце мы таксама будзем прытрымлівацца самых высокіх патрабаванняў бяспекі, безумоўна, арыентуючыся на лепшы вопыт нашага стратэгічнага партнёра - дзяржкарпарацыі "Расатам" як у частцы далейшай эксплуатацыі АЭС, так і ў рамках развіцця фактычна новага для нас напрамку - абыходжання з радыеактыўнымі адходамі і стварэння адпаведнай інфраструктуры", - падкрэсліў Віктар Каранкевіч.
версія для друку
зрабіць стартавай
дабавіць у выбранае