Падзеі

Канцэпцыя міграцыйнай палітыкі зацверджана ў Беларусі

Фота з архiва

25 студзеня, Мінск /Кар. БЕЛТА/. Канцэпцыя міграцыйнай палітыкі на 2024-2028 гады зацверджана ў Беларусі. Гэта прадугледжана пастановай Саўміна ад 23 студзеня 2024 года нумар 48, апублікаванай на Нацыянальным прававым інтэрнэт-партале, паведамляе БЕЛТА.

Адзначаецца, што мэтай міграцыйнай палітыкі Беларусі з'яўляецца стварэнне ўмоў, якія забяспечваюць нацыянальную бяспеку, устойлівы эканамічны рост і павышэнне якасці жыцця грамадзян, дэмаграфічнае развіццё, абарону рынку працы і інтэграцыю ў рынак працы мігрантаў.

У дакуменце абазначаны асноўныя напрамкі міграцыйнай палітыкі, па якіх будзе ажыццяўляцца міжнароднае супрацоўніцтва ў гэтай сферы. Прадугледжваецца фарміраванне адзінай міграцыйнай прасторы Беларусі і Расіі для дасягнення мэт Саюзнай дзяржавы, паглыбленне супрацоўніцтва па пытаннях міграцыі ў рамках Еўразійскага эканамічнага саюза, Арганізацыі Дагавора аб калектыўнай бяспецы, Садружнасці Незалежных Дзяржаў, развіццё міжнароднага супрацоўніцтва па пытаннях барацьбы з незаконнай міграцыяй.

У сферы аптымізацыі ўнутраных і знешніх міграцыйных патокаў прадугледжваецца ажыццяўленне палітыкі па добраахвотным перасяленні ў Беларусь на пастаяннае месца жыхарства асоб, "якія маюць падобныя з народам краіны духоўныя каштоўнасці і хочуць інтэгравацца ў беларускае грамадства для рэалізацыі свайго інтэлектуальнага, культурнага і інвестыцыйнага патэнцыялу, а таксама беларусаў замежжа". У Беларусі гатовы ствараць умовы для адаптацыі і інтэграцыі мігрантаў, садзейнічаць міграцыі, звязанай з ажыццяўленнем інвестыцый, прадпрымальніцкай і інавацыйнай дзейнасцю, а таксама ў сферы адукацыі і падтрымкі акадэмічнай мабільнасці.

Кантроль за выкананнем пастановы ўскладзены на Міністэрства ўнутраных спраў, Камітэт дзяржаўнай бяспекі, Міністэрства працы і сацыяльнай абароны, Дзяржаўны пагранічны камітэт, Дзяржаўны мытны камітэт, Міністэрства замежных спраў, Міністэрства эканомікі, Міністэрства спорту і турызму, Міністэрства адукацыі, Міністэрства аховы здароўя і Нацыянальную акадэмію навук Беларусі ў адпаведнасці з кампетэнцыяй.

версія для друку

зрабіць стартавай

дабавіць у выбранае