Падзеі

Качанава: Кітай для Беларусі - блізкі, надзейны сябар і добры партнёр

16 мая, Мінск /Кар. БЕЛТА/. Кітай для Беларусі - блізкі, надзейны сябар і добры партнёр, заявіла старшыня Савета Рэспублікі Наталля Качанава ў час сустрэчы з Надзвычайным і Паўнамоцным Паслом Кітайскай Народнай Рэспублікі ў Рэспубліцы Беларусь Се Сяаюнам, перадае карэспандэнт БЕЛТА.

"Для нас Кітай з'яўляецца блізкім, надзейным сябрам і добрым партнёрам. Мы ўдзячны за тыя добрыя адносіны, якія складваюцца паміж нашымі краінамі і ганарымся гэтымі адносінамі. У многім такія добрыя, канструктыўныя адносіны - вялікая заслуга нашых лідараў - Прэзідэнта Беларусі Аляксандра Лукашэнкі і старшыні КНР Сі Цзіньпіна. У 2023 годзе адбыўся візіт Аляксандра Лукашэнкі ў Кітай, па выніках якога былі вызначаны асноўныя вектары далейшага супрацоўніцтва паміж нашымі краінамі. Важна, што былі вызначаны задачы ў супрацоўніцтве паміж парламентарыямі нашых краін", - расказала Наталля Качанава.

Паводле слоў спікера, парламентарыі дзвюх краін узаемадзейнічаюць даволі эфектыўна. "Мы правялі даволі сур'ёзныя мерапрыемствы, якія, на мой погляд, яшчэ больш паглыбілі нашы адносіны. Па лініі жаночых арганізацый - правялі семінар жанчын Беларусі і Кітая. Зусім нядаўна правялі круглы стол па пытаннях маладзёжнай палітыкі, што вельмі важна", - падкрэсліла старшыня Савета Рэспублікі.

"Мы падпісалі пагадненне аб супрацоўніцтве паміж Нацыянальным сходам Рэспублікі Беларусь і Усекітайскім сходам народных прадстаўнікоў. І практычна ўжо сфарміраваны Камітэт па супрацоўніцтве паміж парламентарыямі нашых краін", - дадала Наталля Качанава.

Савет Рэспублікі ўдзяляе прыярытэтную ўвагу развіццю міжпарламенцкага супрацоўніцтва з Кітайскай Народнай Рэспублікай.

версія для друку

зрабіць стартавай

дабавіць у выбранае