Падзеі

У спісе ўзнагароджаных 95 чалавек. Гэта вучоныя, сацыяльныя работнікі, урачы, выкладчыкі, работнікі прамысловасці, лясной галіны, аграрыі, будаўнікі, нафтавікі, прадстаўнікі падатковых органаў, дзяржаўныя служачыя, творчая інтэлігенцыя. Яны ўдастоены высокіх узнагарод за шматгадовую плённую працу, узорнае выкананне службовых абавязкаў, высокі прафесіяналізм.

Сярод узнагароджаных вялікая група медыцынскіх работнікаў. Андрэй Кабякоў адзначыў, што цяпер у ахове здароўя краіны выкарыстоўваюцца лепшыя дасягненні сусветнай і айчыннай медыцыны. "Апошнія гады айчынная ахова здароўя значна рушыла наперад, па якасці аказання медыцынскіх паслуг Беларусь выходзіць на перадавыя пазіцыі ў свеце. У краіне выбудавана дакладная сістэма аказання меддапамогі на ўсіх узроўнях", - падкрэсліў ён.

Высокія ўзнагароды атрымалі і прадстаўнікі сферы адукацыі - педагогі і кіраўнікі ўстаноў розных узроўняў. "Яны ўнеслі значны ўклад у развіццё нацыянальнай сістэмы адукацыі, падрыхтоўку высокакваліфікаваных кадраў і выхаванне моладзі, павышэнне якасці працэсу навучання за кошт укаранення ў практыку сучаснага метадычнага забеспячэння і выкарыстанне новых адукацыйных тэхналогій. Разам з тым Прэзідэнт паставіў дакладныя задачы, якія неабходна вырашыць у бліжэйшы час - і ў першую чаргу гэта ўзмацненне сістэмы прафарыентацыі ў нашай адукацыі. Немалаважным застаецца і пытанне павышэння якасці падручнікаў", - растлумачыў Андрэй Кабякоў.

Падзякі Прэзідэнта за актыўны ўдзел у грамадска-палітычным жыцці краіны былі ўручаны групе работнікаў прафсаюзаў. "Вашы ініцыятывы і прапановы маюць канструктыўны характар і адпавядаюць духу часу. Узяць, напрыклад, прапанову аб узмацненні абароны правоў асоб, якія працуюць па кантракце, і заканадаўчае ўзмацненне адказнасці наймальніка за выкананне абавязацельстваў перад работнікамі. Актыўна абмяркоўваецца ініцыятыва прафсаюзаў і па пытанні аб скарачэнні страхавога стажу для шматдзетных маці і былых ваенных", - звярнуўся да прадстаўнікоў прафсаюзаў прэм'ер-міністр.

Высокія ўзнагароды атрымалі і работнікі будаўнічай галіны. "Для захавання тэмпаў жыллёвага будаўніцтва, у тым ліку і з дзяржпадтрымкай, урад прадаўжае работу над вырашэннем шэрага пытанняў. Сярод іх - уключэнне ў жыллёвае будаўніцтва крэдытных рэсурсаў усіх камерцыйных банкаў краіны, а таксама паступовае зніжэнне ўзроўню працэнтных ставак па банкаўскіх крэдытах, якія будуць прадастаўляцца на агульных умовах", - акцэнтаваў увагу Андрэй Кабякоў.

Сярод узнагароджаных - група дарожных рабочых, дзякуючы намаганням якіх у краіне актыўна ідзе рэканструкцыя аўтадарог. "Сёння завяршаецца работа па стварэнні якасных аўтатрас адпаведнага класа, якія звязваюць абласныя цэнтры з Мінскам. Разам з тым неабходна дакладна выканаць даручэнне кіраўніка дзяржавы і прывесці ў парадак мясцовую дарожную сетку на працягу 3-4 гадоў. Па розных ацэнках, ад 6 да 10 тыс. км дарог патрабуюць рамонту", - паведаміў прэм'ер-міністр.

Андрэй Кабякоў падкрэсліў, што ўзнагароды атрымліваюць і работнікі Магілёўскага завода ліфтавага машынабудавання. "Радасна адзначыць, што з кожным годам прадпрыемства значна ўмацоўвае свае пазіцыі на сусветным рынку. Сёння тут выпускаецца больш за 135 базавых мадэлей ліфтаў, за 2016 год выпушчана і адгружана звыш 12,5 тыс. ліфтаў. І сёння беларускія ліфты выкарыстоўваюцца на такіх знакавых аб'ектах, як касмадром Байканур і Ленінградская АЭС", - адзначыў ён.

За шматгадовую і плённую працу, высокі прафесіяналізм, значны ўклад у патрыятычнае выхаванне і падрыхтоўку моладзі да воінскай службы і працоўнай дзейнасці работнікам рэспубліканскага дзяржаўна-грамадскага аб'яднання "Добраахвотнае таварыства садзейнічання арміі, авіяцыі і флоту Рэспублікі Беларусь" сёння таксама былі ўручаны падзякі Прэзідэнта. "ДТСААФ з'яўляецца апорай дзяржавы ў пытаннях падрыхтоўкі моладзі да ваеннай службы і працоўнай дзейнасці. Мы лічым абароннае таварыства неад'емнай часткай сістэмы нацыянальнай бяспекі Беларусі. Сёння яно мае добрую прадуманую праграму свайго далейшага паступальнага руху наперад, цесна ўвязаную з паказчыкамі сацыяльна-эканамічнага развіцця дзяржавы, і ўпэўнена глядзіць у будучыню", - канстатаваў прэм'ер-міністр.

Заслужаныя ўзнагароды былі таксама ўручаны прадстаўнікам творчай інтэлігенцыі, спартсменам, дзяржслужачым. "Прэзідэнт паставіў дакладную задачу зрабіць дзяржслужбу адной з самых прывабных. На гэта нацэлена аптымізацыя дзяржапарату, якая праводзіцца ў краіне. Размова не ідзе аб механічным скарачэнні колькасці, а аб рацыянальным пераглядзе функцый, выключэнні іх дубліравання і дэлегаванні на месцы паўнамоцтваў, правоў на прыняцце рашэнняў. Пры гэтым адным з асноўных крытэрыяў эфектыўнасці дзяржапарату павінна быць уменне працаваць з людзьмі, а таксама чула і ўважліва ставіцца да кожнага чалавека, да яго просьбаў і патрэб", - рэзюмаваў Андрэй Кабякоў.

Прэм'ер-міністр сардэчна павіншаваў усіх узнагароджаных і адзначыў, што тое, што сённяшняя цырымонія праходзіць напярэдадні Дня Перамогі, вельмі сімвалічна. "Таму завяршыць сваё выступленне хацеў бы словамі маршала СССР Георгія Жукава "час не мае ўлады над веліччу ўсяго, што мы перажылі ў вайну, а народ, які перажыў аднойчы вялікія выпрабаванні, будзе і надалей чэрпаць сілы ў гэтай перамозе", - рэзюмаваў кіраўнік урада.