Падзеі

Якія навацыі ўключаны ў законапраект аб Выбарчым кодэксе

Фота з архiва

Законапраект "Аб змяненні Выбарчага кодэкса Рэспублікі Беларусь" гатовы да разгляду ў першым чытанні. Як чакаецца, яго дэпутаты абмяркуюць на чарговым пасяджэнні сесіі Палаты прадстаўнікоў 14 снежня. Аб плануемых навацыях карэспандэнту БЕЛТА расказаў намеснік старшыні Пастаяннай камісіі па дзяржаўным будаўніцтве, мясцовым самакіраванні і рэгламенце Палаты прадстаўнікоў Віктар Свіла.

"Напярэдадні мы правялі пасяджэнне профільнай камісіі, на якім разгледзелі гэты законапраект. Ён паступіў у Палату прадстаўнікоў 6 снежня і ўнесены Прэзідэнтам. Сёння мы яго падрабязна разабралі, прааналізавалі і прынялі рашэнне аб тым, што яго трэба выносіць на разгляд дзявятай сесіі Палаты прадстаўнікоў 14 снежня ў першым чытанні. Гэта значыць у аўтарскай рэдакцыі, - расказаў Віктар Свіла. - Гэта даволі сур'ёзны дакумент з мноствам змяненняў, але я вылучыў бы асноўныя. Нагадаю, з 15 сакавіка ў нас у краіне дзейнічае абноўленая Канстытуцыя, змяненні ў якую мы даволі шырока абмяркоўвалі, шмат паступіла прапаноў ад грамадзян. І ў заключных пераходных палажэннях Асноўнага закона строга вызначана, што на працягу двух гадоў уся нарматыўна-прававая база краіны павінна быць прыведзена ў адпаведнасць з новай Канстытуцыяй. Змяненні Выбарчага кодэкса - адна з пазіцый вялікага плана заканатворчай дзейнасці. І асноўныя змяненні зноў жа вынікаюць са змяненняў Канстытуцыі".

Дэпутат нагадаў, цяпер у палітычнай сістэме краіны, акрэсленай Канстытуцыяй, з'явіўся новы суб'ект - Усебеларускі народны сход. "Парадак выбрання часткі дэлегатаў, спецыяльныя паўнамоцтвы вызначаюцца ў выбарчым заканадаўстве. У кодэксе з'яўляецца новы раздзел, які вызначае парадак вылучэння дэлегатаў УНС ад мясцовых саветаў дэпутатаў і суб'ектаў грамадзянскай супольнасці, - адзначыў дэпутат. - Яшчэ раней, да змянення на рэферэндуме Канстытуцыі, Палата прадстаўнікоў прымала законапраект аб адзіным дні галасавання. Гэта норма ўжо была перанесена ў дзеючую Канстытуцыю і паўплывала на змяненне парадку правядзення выбараў у Палату прадстаўнікоў, Савет Рэспублікі і мясцовыя саветы дэпутатаў. Як вынік, змянілася сістэма выбарчых камісій, паколькі спатрэбілася мадэрнізацыя. Сёння законапраект змяшчае палажэнне, што ў кампетэнцыі акруговых выбарчых камісій, якія будуць выбіраць дэпутатаў Палаты прадстаўнікоў, уводзіцца абавязак выбіраць дэпутатаў мясцовых саветаў і Мінгарсавета. А для гэтага трэба ўпісаць акругі абласнога ўзроўню і Мінгарсавета ў акругі па выбарах дэпутатаў Палаты прадстаўнікоў. У сувязі з гэтым, адпаведна, мяняецца і ўся сістэма", - удакладніў парламентарый.

Частка змяненняў датычыцца непасрэдна парадку правядзення выбараў. "Так, не будуць фарміравацца выбарчыя камісіі за мяжой. Мяняецца час галасавання ў датэрміновы перыяд. Калі мы раней галасавалі з 10.00 з перапынкам, то цяпер прапануецца праводзіць датэрміновае галасаванне без перапынку і пачаць яго пазней - з 12.00 да 19.00" - удакладніў дэпутат.

"Трэба падкрэсліць, што гэты законапраект у цэлым сінхранізуецца са многімі іншымі законамі, якія цяпер таксама распрацоўваюцца ў адпаведнасці з планам, разлічаным на два гады, які я ўжо згадваў. У прыватнасці, гэта законапраекты аб Усебеларускім народным сходзе, аб асновах грамадзянскай супольнасці, - дапоўніў Віктар Свіла. - Законапраект цікавы, насычаны. Думаю, грамадзянам будзе цікава з ім азнаёміцца. Трэба адзначыць, што той вопыт, які ў нашай краіне быў у перыяд усенароднага абмеркавання змяненняў у Канстытуцыю, часткова быў прыменены і ў перыяд падрыхтоўкі гэтага законапраекта. Прапановы таксама паступалі ад грамадзян. У прыватнасці, на Прававы партал, дзе быў размешчаны гэты дакумент. Больш таго, я скажу нават, што адно з выязных пасяджэнняў Савета Палаты прадстаўнікоў прайшло ў горадзе Лідзе, дзе з шырокім прыцягненнем грамадскасці, і перш за ўсё, вядома, дэпутатаў мясцовых саветаў, праект гэтага закона мы абмяркоўвалі яшчэ да яго ўнясення ў парламент. Абмеркаванне было жывое і зацікаўленае".

Дэпутат дадаў, што законапраект "Аб змяненні Выбарчага кодэкса Рэспублікі Беларусь" даволі добра збалансаваны і ўсёабдымны". "Я не выключаю нейкіх тэхнічных правак, але мне здаецца, што істотных змяненняў да другога чытання не будзе", - канстатаваў Віктар Свіла.

Святлана СУХАРКО,
БЕЛТА

версія для друку

зрабіць стартавай

дабавіць у выбранае