Падзеі

Як сельская гаспадарка Беларусі спраўляецца з наступствамі гарачыні

У Беларусі ў чэрвені ўсталявалася анамальна гарачае надвор'е. На мінулым тыдні тэмпературны фон перасягаў кліматычную норму на 5-8 градусаў, на гэтым паказчыкі перавышаны месцамі нават на 8-10 градусаў. Сітуацыя пагаршаецца з-за няхваткі вільгаці: сіноптыкі прагназуюць, што сухое надвор'е захаваецца і толькі ў асобных раёнах магчымы невялікія дажджы. Гарачыня і засуха неспрыяльна ўплываюць на фарміраванне ўраджаю сельгаскультур. 12 чэрвеня Прэзідэнт заслухаў даклады міністра сельскай гаспадаркі і харчавання Анатоля Хацько і профільнага віцэ-прэм'ера Уладзіміра Дворніка аб сітуацыі, што складваецца ў сельскай гаспадарцы, і дадатковых мерах, якія прымаюцца для захавання ўраджаю.

Аб неабходнасці дадатковых мер у сувязі з кліматычнымі ўмовамі Прэзідэнт гаварыў яшчэ напярэдадні. "На ўсходзе, на захадзе і ў цэнтры праблемы будуць у залежнасці ад таго, якія глебы. На лёгкіх глебах ужо, я гляджу, пачаліся пажаўценні пасеваў, таму трэба не ўпусціць час і ўбраць такія пасевы своечасова. Цяпер ідзе нарыхтоўка сенажу - трэба ўсё гэта пакласці ў сянаж, - адзначыў Аляксандр Лукашэнка. - Трэба па-гаспадарску паглядзець у сувязі з кліматычнымі ўмовамі, што зрабіць у раслінаводстве. Ні ў якім разе нічога не страціць".

Папаўняць збожжавую групу неабходна за кошт кукурузы. "Яна пакуль на ўсіх участках (я гэта сам кантралюю і бачу), нават на пясчаных глебах, трымаецца добра, таму трэба зрабіць стаўку на нарыхтоўку зерня з кукурузы", - лічыць кіраўнік дзяржавы. Пры гэтым, звярнуў ён увагу, неабходна дзейнічаць па правераных тэхналогіях, кансервуючы кукурузнае зерне ў рукавы. "Жывёла любіць гэты корм. І ён будзе таннейшы, чым сушыць. Працэнтаў на 25-30. Фактычна кукурузнае зерне ў такім выпадку можна параўнаць па эфектыўнасці і затратах на вытворчасць са звычайным збожжам. Таму, калі мы цяпер будзем касіць тое, што на зерне ў сянаж, трэба спадзявацца на кукурузу і ўдзяліць ёй асаблівую ўвагу. Там, дзе гэта немагчыма, зрабіць усё для таго, каб пустыя, свабодныя, неўзараныя плошчы перасеяць аднагадовымі або яшчэ якімі-небудзь культурамі", - сказаў Прэзідэнт.

Анатоль Хацько адзначыў, што кукурузы ў гэтым годзе ў Беларусі пасеяна прыкладна на 110 тыс. га больш за план. "Чакаем дадаткова атрымаць 1 млн т зерня, каб забяспечыць жывёлагадоўлю. Калі кансерваваць зерне ў рукавы, гэта будзе зніжаць кошт кармоў, спрашчаць тэхналогію і павышаць вытворчасць жывёлагадоўчай прадукцыі", - упэўнены ён.

Сітуацыю ў сельскай гаспадарцы міністр ацэньвае як неадназначную: разлікі на ўраджай закладзены добрыя, але ўсталявалася гарачыня, ападкі выпадаюць нераўнамерна і ў недастатковай колькасці. "Мы прымаем усе неабходныя меры, каб забяспечыць жывёлагадоўлю і харчовую бяспеку. Абследуем пасевы збожжавых у кожнай вобласці, у кожным раёне і, калі ёсць падсыханне, убіраем іх на зялёны корм і праводзім перасяванне  прамежкавымі культурамі. У гэтым годзе перасеяны ўжо азімыя культуры, якія былі ў дрэнным і нездавальняючым стане. Прыняцце аператыўных рашэнняў дае магчымасць нарыхтаваць дадатковыя кармы", - сказаў ён.

У цэлым ураджай збожжавых чакаецца вышэйшы, чым у мінулым годзе. Збожжа для харчовых мэт у Беларусі будзе дастаткова, запэўніў Анатоль Хацько. "Акрамя таго, у нас ёсць яшчэ леташнія астаткі мукі і круп. Яшчэ прадаўжаецца рэалізацыя мукі на экспарт", - дадаў ён. Пры гэтым міністр падкрэсліў, што не варта разлічваць на мінулагоднія рэзервы - неабходна нарыхтаваць максімальны ўраджай.

Завяршаецца ўборка траў першага ўкосу. Крыху адстае Віцебская вобласць, там неабходна нарошчваць тэмпы сельгасработ. "З міністэрства ў рэгіёны прыязджаюць рабочыя групы, каб аказваць і метадалагічную, і практычную дапамогу, кантраляваць ход уборкі кармоў - яна павінна прайсці якасна і своечасова. Усе пытанні вырашальныя, мы накіроўваем на гэта рэсурсы і сілы", - заявіў міністр. У гэтым годзе кармы першага ўкосу нават крыху лепшыя за мінулагоднія па колькасці і якасці. "Мы ў гэтым годзе пачалі ўборку кармоў крыху пазней, але пры гэтым тэрміны скарочаны на 8-9 дзён. Зразумела, за кошт скарачэння тэрмінаў і якасць будзе лепшай. І мы бачым, што збяром нават крыху больш кармоў першага ўкосу, чым у мінулым годзе", - расказаў Анатоль Хацько.

Сіноптыкі прагназуюць далейшае ўскладненне ўмоў для фарміравання ўраджаю сельгаскультур. "У першай дэкадзе чэрвеня з-за дэфіцыту ападкаў практычна на ўсёй тэрыторыі Беларусі адбылося змяншэнне вільгацезапасаў у глебе. Плошчы з няхваткай глебавай вільгаці ў паўднёва-ўсходняй частцы, па ўсходзе і захадзе краіны пашырыліся. На плошчах з недастатковай вільгацезабяспечанасцю назіраецца завяданне раслін, пажаўценне і засыханне лісця ў збожжавых культур, на асобных участках пачалося засыханне сцёблаў. У  бліжэйшы час гарачае з недаборам ападкаў надвор'е будзе садзейнічаць далейшай страце глебавай вільгаці", - сказалі ў Белгідрамеце. Неспрыяльная сітуацыя склалася ў асобных раёнах Гомельскай і Мінскай абласцей. У такіх аграметэаралагічных умовах асабліва важным становіцца прыняцце своечасовых мер для захавання ўраджаю. Як запэўнілі ў Мінсельгасхарчы, сітуацыя знаходзіцца на кантролі ў спецыялістаў ведамства, а таксама ў рэгіёнах.

На наступным тыдні адказныя асобы даложаць Прэзідэнту аб тым, як ідуць справы ў беларускім раслінаводстве.

Валерыя ГАЎРЫЛАВА,
БЕЛТА.

версія для друку

зрабіць стартавай

дабавіць у выбранае