Падзеі

Госці з больш як 30 краін прымуць удзел у канферэнцыі высокага ўзроўню ў Мінску

Фота з архiва

25 кастрычніка, Мінск /Кар. БЕЛТА/. Звыш 300 гасцей з больш як 30 краін прымуць удзел у міжнароднай канферэнцыі высокага ўзроўню "Еўразійская бяспека: рэальнасць і перспектывы ў трансфармуемым свеце", якая адбудзецца ў Мінску 26-27 кастрычніка, паведамляе БЕЛТА.

"У нас цяпер 180 пацверджаных замежных удзельнікаў. Усяго амаль 300 гасцей. З 180, напэўна, чалавек 120 спецыяльна дзеля гэтай канферэнцыі прыбудуць сюды. Удзельнікі - з усіх частак свету. Мы паспрабавалі сабраць максімальна магчымы прадстаўнічы склад гасцей", - расказаў журналістам прэс-сакратар МЗС Беларусі Анатоль Глаз.

Ён адзначыў, што ў цяперашніх рэаліях вельмі цяжка правесці такія мерапрыемствы - сабраць у адным месцы прадстаўнікоў Захаду і Усходу. Але беларускаму боку ўдалося рэалізаваць гэту задачу: "Многія скептычна ставіліся да гэтай ідэі. Але колькасць заяўленых (удзельнікаў. - Заўвага БЕЛТА) і іх узровень сведчаць аб тым, што, можа, нейкая дыскусія атрымаецца. Зразумела, гаварыць аб тым, што мы тут збяромся і за два дні вырашым, як Еўразіі далей бяспечна жыць, ніхто такіх ілюзій не мае. Але наша задача - хаця б намеціць шляхі, каб людзі пагаварылі, пачулі адзін аднаго".

Мэта канферэнцыі - адкрытая і інклюзіўная дыскусія аб перспектывах еўразійскай бяспекі ва ўмовах крызісу існуючага светапарадку, хранічных ваенна-палітычных супярэчнасцей паміж ключавымі ігракамі і практычна поўнай адсутнасці камунікацый паміж імі.

Ініцыятыву аб правядзенні такой канферэнцыі агучыў Прэзідэнт Беларусі Аляксандр Лукашэнка ў лістападзе 2022 года на саміце АДКБ у Ерэване. Як вядома, Беларусь цяпер старшынствуе ў арганізацыі пад дэвізам "Праз салідарнасць і супрацоўніцтва да міру і бяспекі". Гаворачы аб прыярытэтных напрамках старшынства, кіраўнік дзяржавы тады прапанаваў правесці шырокае абмеркаванне міжнароднага парадку дня на палях канферэнцыі высокага ўзроўню па праблематыцы еўразійскай бяспекі з запрашэннем вышэйшых службовых асоб сакратарыятаў ААН, ШАС, СНД, іншых міжнародных арганізацый.

У ліку ўдзельнікаў пленарнага пасяджэння высокага ўзроўню заяўлены міністр замежных спраў Расіі Сяргей Лаўроў, генеральны сакратар АДКБ Імангалі Тасмагамбетаў, генеральны сакратар Нарады па ўзаемадзеянні і мерах даверу ў Азіі Кайрат Сарыбай, намеснік генеральнага сакратара ШАС Рыгор Логвінаў, дзяржаўны сакратар Саюзнай дзяржавы Дзмітрый Мезенцаў, першы намеснік Генеральнага сакратара СНД Леанід Анфімаў, член Калегіі (міністр) па тэхнічным рэгуляванні Еўразійскай эканамічнай камісіі Віктар Назаранка.

Чакаецца, што на канферэнцыі будзе агучана пасланне міністра замежных спраў КНР Ван І, плануецца ўдзел Саюзнага міністра па справах Саюзнага ўрада М'янмы Ко Ко Хлайна, намеснікаў міністраў замежных спраў Казахстана, Таджыкістана, Ірана.

На працягу двух дзён работы канферэнцыі пройдзе таксама шэраг тэматычных і спецыяльных сесій, прысвечаных розным пытанням. Геаграфія ўдзельнікаў канферэнцыі, акрамя Беларусі, прадстаўлена такімі краінамі, як Аўстрыя, Азербайджан, Арменія, Бразілія, Ватыкан, Вялікабрытанія, Венгрыя, В'етнам, Індыя, Іран, Казахстан, Катар, Кітай, Куба, Кыргызстан, Латвія, Манголія, М'янма, Нарвегія, ААЭ, Пакістан, Палесціна, Рэспубліка Карэя, Расія, Сербія, Сірыя, ЗША, Судан, Таджыкістан, Туркменістан, Турцыя, Узбекістан, Францыя, Швейцарыя. Шырока прадстаўлены і розныя міжнародныя арганізацыі і дзяржаўныя аб'яднанні.

Сярод удзельнікаў таксама кіраўніцтва і прадстаўнікі вядучых беларускіх "фабрык думкі", акадэмічных і навуковых колаў. Усяго чакаецца каля 300 удзельнікаў канферэнцыі.

У ходзе мерапрыемства запланавана абмеркаванне некалькіх канкрэтных тэм: глабальныя і рэгіянальныя геапалітычныя перадумовы еўразійскай бяспекі; эканамічная інтэграцыя і спалучэнне на карысць адзінай архітэктуры еўразійскай бяспекі; узаемадзеянне міжнародных/рэгіянальных арганізацый на еўразійскай прасторы; стратэгічная стабільнасць і ядзерная зброя: пагрозы і магчымасці для Еўразіі ў новых умовах.

Прадугледжваецца, што канферэнцыя дасць магчымасць намеціць перспектыўныя контуры еўразійскай бяспекі.

версія для друку

зрабіць стартавай

дабавіць у выбранае